١٨‏/١١‏/٢٠٠٨

مدينتي: كلاكيت تاني مرة !


كتبت هنا من أكثر من عامين عن مشروع "مدينتي" وعن أسعاره الفلكية و الصدمة التى تلقيتها يوم زرت مقر مبيعاتهم في الإسكندرية ...
دارت الأيام ومرت الأيام على رأى الست أم كلثوم وإحتكيت بحكم طبيعة عملى ببعض مشاريع شركة طلعت مصطفى القائمة بالفعل زي مدينة الرحاب وللأمانة بدأ تفكيري يتغير تدريجيا ...

آه أنا مازلت مؤمن إن أسعارهم عالية لكن مش عالية "قوى" زي ما كنت فاكر قبل كدة ... المجتمعات دي بتوفر لقاطنيها "نمط حياه" مختلف عن اللى تعودنا عليه في مصر - وبكلمة نمط حياه أنا أقصد مساحات خضراء وحدائق بيتم الإعتناء بها جيدا ... شوارع واسعة وأماكن إنتظار ومبيت للسيارات بنسب تتوافق مع عدد الوحدات والكثافة السكانية ... أسواق تجارية منظمة ... خدمات أمن ونظافة بجد ... جوامع تستحق أن يطلق عليها كلمة جوامع ... شبكة مواصلات خاصة داخلية وخارجية ... مدارس و مستشفيات ونادي ومولات وملاهي - من الآخر، كل ما تحتاجه أسرة مصرية لتعيش حياه "آدمية" ...

الحاجات دي كلها أكيد بتتكلف فلوس و بيتم تحميلها على سعر الوحدات - ده غير طريقة السداد طويلة الأمد اللى بتزيد عن 10 سنوات لو عايز مما يعني فوائد مركبة و بالتالى زيادة في الأسعار ... حد كان حسبها قبل كدة في أحد المنتديات عشان يطلع سعر المتر كاش يبقى كام لو إفترض الفائدة السنوية ووجده سعر منطقي جدا بالمقارنة بسعر السوق (ده رأيه مش رأيي لأني مازات مؤمن إن الأسعار أعلى شوية من المنطقي)

كل دي كانت مقدمة للموضوع الأصلى ... موضوع عقد أرض مدينتي و طريقة السداد ...

اليوم السابع كانت نشرت نص وبنود عقد مشاركة / تخصيص بين شركة طلعت مصطفى وهيئة المجتمعات العمرانية الجديدة - عقد الأراضى المقام عليها مشروع مدينتي ...

النقطة اللي هاجمتها الجريدة هي قيمة الأرض و طريقة سداد هذه القيمة للدولة إذ أن المتفق عليه في التعاقد هو إن السداد حيكون عبارة عن وحدات سكنية كاملة التشطيب بنفس مستوى تشطيب مدينة الرحاب (تسليم مفتاح - سوبر لوكس يعني) على أن تكون مساحة هذه الوحدات 7% من إجمالى مساحة الوحدات السكنية بالمشروع .

نحسبها بالمنطق وبعدين بالورقة و القلم ...

بالمنطق لو طبقنا نفس النموذج بتاع بيع أراضي دريم لاند لأحمد بهجت حنلاقي الدولة شايفة نفسها "مظلومة" لإن الأرض قيمتها زادت جدا عن ما باعوها - و أحمد بهجت شايف إنه ده حقه لإنه خاطر بمشروع كان ممكن جدا يفشل وساعتها محدش كان حيقف جنبه وبعدين بسبب المشروع بتاعه و نجاحة الدولة باعت الأراضي المتاخمة و القريبة بأضعاف السعر اللي باعت له بيه ...

يبقى الحصول على مقابل عيني عبارة عن نسبة من المشروع هو حل جيد ... لو المشروع نجح قيمة النسبة حتزيد ... لو المشروع فشل أهو الدولة حتسترد الأرض و يادار مادخلك شر.

نيجي للورقة و القلم ... سعر الوحدات في مدينتي تضاعف من ساعة الإعلان عن المشروع وحتى الآن ... يعني سعر المتر بدون تشطيب حسب ما كتبت أول مرة كان 3540 جنيه وده بتاريخ 6 أغسطس 2006 - دلوقتي سعر المتر بدون تشطيب 6330 جنيه (علما بأن الأسعار مستقرة بقالها مدة عشان قضية هشام طلعت ثم شهر رمضان يعنى الكساد الموسمى في سوق العقارات ثم إنخفاض أسعار مواد البناء ثم الأزمة الإقتصادية العالمية وموضوع التمويل العقارى) - يعني لو حد قارن أول سعر إبتدوا بيه بالأسعار الآن حيلاقيه زاد الضعف تقريبا في سنتين ونصف ...

طيب - سعر متر الأرض كدة يبقى واقف بكام؟
المشروع ده فيه 80 ألف وحدة سكنية ... لو متوسط مساحة الوحدة على أقل تقدير 100 متر مربع - يعني 8 مليون متر مربع
سعر المتر الأن بدون تشطيب 6330 ... قول لو متشطب وكمان سنة على الأقل (عند الإستلام) السعر حيبقى بالميت وعشان كاش 6000 جنيه
يبقى سعر الأرض اللي حتصل عليه الدولة لو باعت الوحدات دي في المزاد العلنى هو 7% × 8 مليون متر مربع × 6000 جنيه = 3 مليار و 360 مليون جنيه
طيب الأرض دي كام متر ... الأرض دي 8 ألاف فدان ... يعني الفدان ب 420 ألف جنيه ... يعني المتر بسعر الوضع الحالى ب 100 جنيه !
أرض في الصحراء في آخر نقطة معمورة في القاهرة الجديدة بالحجم ده تتباع ككل بالسعر ده و الدولة غير مسئولة عن شبكة الطرق بداخلها ولا المرافق و الخدمات بداخلها ... السعر عادل جدا .

يبقى ومع كامل الإحترام لجريدة اليوم السابع و للنائب طلعت السادات - "قيمة" بيع الأرض المرة دى كويسة ... وياريت يعملوا كده كل مرة !




٣١‏/١٠‏/٢٠٠٨

شلوت لفوق ...



لطيفة قوي بلدنا دي - لما حد يكتر عليه الكلام سواء بالسلب أو بالإيجاب (وطالما لم يغضب النظام بصورة مباشرة ) يظروفوه شلوت لفوق - يا يرشق مكان ما شاطوه يا يلّق ويقع على جدور رقبته ...

... وأهو فى الحالتين يبقى إتنيل إتشاط - وعجبى !!

٢٠‏/١٠‏/٢٠٠٨

المتسربين من الوطن ...


المتسربين كلمة طالما سمعتها و أنا أصغر نسبيا ... لم ألتفت لها كثيرا شأني شأن ناس كتيير قوى ... المتسربين من التعليم - المتسربين من الخدمة العسكرية - الأطباء المتسربين ... إلخ
لمن لم يسمع بهذا المصطلح من قبل - دي صفة بتطلق على الإشخاص اللي بيخرجوا عشوائيا عن النظام الإجباري أو النظام المتعارف عليه ... يعني لو شاب تخرج ولم يتقدم لتحديد موقفه من الخدمة العسكرية - أو لو ولد أو بنت ترك المدرسة قبل إنهاء التعليم الأساسى - أو لو طبيب لم يتقدم لأداء فترة التكليف بتاعته ... دول بيسموهم متسربين

دائما كانت عندي قناعة إن وجود متسربين معناه وجود قصور فالنظام - القصور ده هوه اللي بيدفع عناصر النظام للتسرب ... وكل ما يزيد القصور كل ما تزيد نسبة التسرب !

مؤخرا لاحظت زيادة أعداد المتسربين من "الوطن" ... عدد الناس اللي بتسافر و تسيب البلد سواء سعيا وراء الرزق أو العلم بيزيد كل سنة عن السنة اللي قبلها ...
طيب - لو طبقت نفس القاعدة / القناعة اللى عندي على الموضوع ده حتكون النتيجة إنه فيه قصور في النظام العام "للوطن" - قصور بيدفع أبناء الوطن ده إنهم يخرجوا عن النظام الطبيعي بإنهم يسيبوا البلد اللي إتولدوا وإتربوا و إتعلموا فيها ويروحوا أماكن تانيه ... ولو إفترضنا إن أهم سببين للسفر هم السعى وراء الرزق أو العلم يبقى القصور بيزيد كل سنة في الحتتين دول بالذات.

النهاردة على مصراوي خبر لطيف (جنبه صورة لأحمد نظيف) بيقول 6.32 مليار دولار تحويلات المصريين العاملين بالخارج عن العام الماضي 2006/2007 مقابل 2.84 مليار دولارسنة 2001 بزيادة قدرها 222% في 5 أو 6 سنين ...

ده رقم لا أعتبره مؤشر حقيقي للتسرب لإن ممكن ده يكون بسبب زيادة الأجور في الخارج (متوسط زيادة الأجور في الخليج السنة اللي فاتت 11.4%) أو تغيير في شرائح العمالة المصرية في الخارج كأن تزيد أعداد حملة المؤهلات العليا على حساب أعداد غير المتعلمين وحملة المؤهلات المتوسطة مما يعنى زيادة الرقم الإجمالى دون زيادة عدد العمالة بنفس النسبة ...

يعني فيما يتعلق بالمتسربين مش ده الرقم اللي يخض !

الرقم اللى يخض فعلا هو إن 44 % من المليون مصري اللى حصلوا على تصاريح عمل رسمية في الخارج السنة اللى فاتت حصلوا عليها لأول مرة ... يعنى ما يقرب من نصف الرقم ده سافروا / تسربوا السنة اللي فاتت بس !!

أظن دي مصيبة بكل المقاييس ... مصيبة بتؤكد فشل النظام في تأمين فرص عمل "حقيقية" للشباب ...

متوسط الزيادة السكانية في مصر في السنوات الأخيرة 1.3 % سنويا - يعني إحنا بنزيد حوالى مليون نسمة سنويا ... طبقا لهرم السكان في مصر فتقريبا نصف الرقم ده من الذكور والنصف الآخر من الإناث ... يعني مصر سابها السنة اللي فاتت قد الذكور اللي إتولدوا فيها تقريبا ... طيب ما أغلب المسافرين للعمل بالخارج من الذكور وده لأسباب تتعلق بالتركيبة الإجتماعية للمجتمع المصرى ولحاجة المجتمعات اللي بنفضل كمصرين السفر للعمل بها (95 % من اللي سافروا سافروا لدول عربية أغلبهم في الخليج)

خلاصة القول - لو إستمرينا كده ثلاث أربع سنين كمان حنروح في داهية مش بس عشان إحنا بنفقد سنويا كل أعداد الذكور المفترض إنهم بيضافوا لقوة العمل - لأ دي المشكلة أكبر بكتير من كده لإن نظريا اللي بيسافروا دول أغلبهم من المؤهلين/الكويسين اللي ملقوش فرصة حقيقية هنا وفي نفس الوقت لقوا حد هناك يقدر إنهم كويسين ... كمان كام سنة مش حيكون فاضل حد "كويس" يشتغل في مصر ..

بصورة مبسطة لو قولنا إن مصر بيُضخ فيها كل سنة 100 شاب متنوعين ما بين الممتاز و المتوسط و المتواضع فمصر بتفقد كل سنة 100 زيهم أغلبهم من الممتازين ... يعني كلها كام سنة والبلد حتنهار داخليا بسبب غياب "الكويسين" و بعد ما كنا بنتفاخر بالقوة العاملة المصرية و أعداد الشباب و إن مصر ولادة مش حيفضل في مصر الولادة غير المكسحين !! (إلا من رحم ربي)

أي حد يقعد مع أي صاحب شركة أو مصنع كبير كان أو صغير حيلاقيه بيشتكي نفس الشكوى المكررة "فيه كتير بس مفيش حد كويس" ...

طب حد عارف إن مؤخرا فيه مصانع في مصر أصبحت بتجيب أطقم عمالة كاملة من الخارج ... من بنجلاديش و الفلبين و الهند لنفس السبب !

فين بقى وزيرة القوى العاملة من الكلام ده ... وهل فيه سياسة موضوعة أو بيتم وضعها للسيطرة على أعداد المتسربين ... أظن دى ضرورة إستراتيجية أهم من هجس كتيير بتقوم به الحكومة يوميا !!

١٢‏/١٠‏/٢٠٠٨

bring back Epitaph_87

We are a group of Egyptian bloggers really bothered by the blockage of the two-year-old blog "Epitaph_87" ( http://www.epitaph-87.blogspot.com ) along her gmail account (epitaph87@gmail.com), since October, 4th , 2008.

She has sent you her problem and requests on Google Help Center and Blogger Support, but in vain.
We wish that you'd help us retrieve that blog and account and answer the requests of our fellow blogress, sending you from (epitaph_1987@hotmail.com)
, and hopefully ASAP

Just for notice, we have published this problem on our blogs!!

Thank You !
Geddo Iskandar
http://geddoiskandar.blogspot.com



٥‏/١٠‏/٢٠٠٨

شبه منحرف ... "فين الفيلم" !!



من يجي سنتين ونصف تندرت على صديق لى أقدم منى في الغربة لما قالى أنا لما أعوز أدخل سينما مش بدور على حد أروح معاه ... أنا أتمشى لأقرب سينما وأبص على الأفيشات وأكتر واحد يعجبنى بدخله ...
قبل أن يمر على كلامه ده 6 أشهر كنت قد بدات ممارسة هذه العادة الذميمة - دخول السينما بدون سابق تخطيط ... بسبب العادة الهباب دي دخلت أفلام منيلة بنيلة زي فيلم "كتكوت" وفيلم "حاحا وتفاحة" اللي دخلته بسبب إسم بلال فضل على الأفيش كما دخلت أفلام جيدة لم يكتب لها النجاح الجماهيري مثل "الأباء الصغار" و "أوقات فراغ" ...

بعد زواجى و إنتقالي للإقامة بأحد التجمعات السكنية شمال شرق القاهرة لم أتوقف عن هذه العادة ... دخول أفضل الأفلام المعروضة بالسينما دون سابق تخطيط حيث شاء القدر أن تكون هناك سينما واحدة بالمول التجاري القديم بالتجمع الذي أقطن به والتي بها شاشتي عرض فقط مما يقلص الفرص و الإحتمالات أمامى - ورغم حرصي الشديد على تجنب أفلام النجم الشاب "شعر الصدر حسين" وأفلام زينة شباب شبرا وباقي المطربين والمطربات وأفلام لاعبي الكرة والراقصات إلا إننى تعرضت لبعض التجارب السيئة مثل فيلم "إحنا إتقابلنا قبل كدة" !!

كل المقدمة دي كانت علشان أبرر لنفسي قبل أي حد تاني إيه "الشيء" اللى شفته النهاردة ده !!
النهاردة خرجت مع زوجتى للسينما بعد إنتهاء أجازة العيد نظريا و إنقشاع الزحام وذهبنا لسينما المول لأجد فيلمين جديدين يعرضان - فيلم "آخر كلام" و فيلم "شبه منحرف"

فيلم "آخر كلام" هو مثال حي ومتجسد لأفلام "السبكي / المقاولات" صغيرة الإنتاج التى تعتمد على بطل أو بطلة موسمية مع خلطة من الأيفيهات المبتذلة وأغنية و رقصة و مشهد ساخن - بالطبع لم أدخله
الفيلم الآخر هو "شبه منحرف" لرامز جلال ...

على المستوى الشخصي يجب أن أعترف بأن رامز جلال من الممثلين الذين يجيدون إضحاكي و قد أعجبنى فيلمه الأول "أحلام الفتى الطائش" وأظنه حقق إيرادات لابأس بها ... رامز جلال "كان" من الممكن إعتباره صورة من أحمد حلمى ظهرت متأخرة بعض الشيء (نفس الدفعة هو و أحمد حلمى و أحمد السقا و محمد سعد) حيث سلك رامز نفس الخطوات السينمائية تقريبا بدءا من أدواره المساعدة في افلام مثل "الباشا تلميذ" و "غاوي حب" ثم البطولات المشتركة في أفلام مثل "عيال حبيبة" وأخيرا البطولات المطلقة بفيلمه "أحلام الفتى الطائش"

الفيلم من تأليف سامح سر الختم صاحب أفلام "أسد و أربعة قطط" و "عوكل" و "هو فيه إيه" و "شيكامارا" وهي أفلام تتباين في مستواها و إن كان أفضلهم لا يرقى لدرجة جيد جدا لذا لم أتوقع أن يكون الفيلم عالى المستوى وقد ساعد على توقعاتى هذه كون الفيلم من إخراج "وليد محمود" مخرج الفيديو كليبات في أول تجاربه السينمائية (بالنسبة لي على الأقل) كما يجب ذكر أن الإنتاج لشركة ميلودي بيكتشرز المالكة لمجموعة قنوات ميلودى ولعل هذا يبين سر التعاون بينهم وبين المخرج !

خلاصة القول دخلت صالة العرض ممنيا نفسي بفيلم خفيف يضحكنى بعض الشيء ولا أتوقع أن يعلق بذاكرتى - لكن اللى كان شغال ده مهزلة بكل المقاييس ...
- لا توجد قصة تقريبا و قد ساهم المونتاج بشكل واضح في بتر أطرافها قبل أن تنمو ليبدو الفيلم في النهاية كثوب مهترىء ملىء بالثقوب دون أدنى محاولات لترقيعة وستر عورته !!
- السيناريو من أسوء ما يكون حيث طغت عليه اللامنطقية و سيطر عليه الملل في أغلب أوقات ...

- لا يوجد بناء درامي للعديد من الشخصيات مثل شخصية "نشوى مصطفى" التى كان من الممكن حذف مشاهدها بالكامل دون التأثير على الفيلم ...

- تم إقحام بعض الشخصيات على الأحداث بصورة ركيكة لا لشىء سوى الإطالة مثل "أحمد التهامى" ...

- طغى الإفتعال على أداء معظم الممثلين مثل "حسن حسنى" ، "نشوي مصطفى" ‘ "أحمد التهامي" ، "غسان مطر" و "رضا إدريس"

- أداء رامز جلال بدا جيدا إلا أن السيناريو شديد الضعف سرق الضحكات التى كان ليستحقها ...

- أداء زينة لم يضف إليها أى جديد كما شابه الإفتعال في بعض الأوقات

- الإخراج دون المستوي والراكورات تتوالى طيلة الفيلم بمعدلات لا نراها في أفلام الهواه ولا في الأفلام المستقلة ذات الإنتاج المحدود

- حركة الكاميرا في 25 % من المشاهد أقرب للفيديو كليب منها للفيلم السينمائي


التقييم الشخصي الفيلم: ضعيف (3/10) ولا أنصح بمشاهدته

ملحوظة هامة: أثناء كتابة هذه السطور تعرض قناة "fox movies" فيلم "just married" لأشتون كوتشر و بريتني ميرفي - الفيلم من إنتاج 2003 و قد إعتمد على فكرة مستهلكة وعلى أبطال مغمورين (وقتها) ولكن بوجود كاتب سيناريو ومخرج مجتهدين خرج فيلم جماهيري لطيف يمكن مشاهدته بإستمتاع لآخر لحظة كما تم ترشيحه لنيل عدة جوائز.




٢٧‏/٩‏/٢٠٠٨

مستنيين إيه يولع عشان تتحركوا - الهرم الأكبر !!!


وكأن حريق مجلس الشورى لم يكفيهم ليحترق و بنفس السيناريو المسرح القومى المصري ... مازالت الأخبار حتى لحظة كتابة هذه السطور مقتضبة ومنقوصة وعدد الضحايا غير معرف ... لم يتأكد سوى أن القاعة الرئيسية دمرت بالكامل وأن القبة الشهيرة قد إنهارت !!

قبل ما أقول أى كلام و حتى لا أتهم بالتحامل على النظام أو على جهاز الدفاع المدنى المصري وجب التذكير بالآتي:

27-09-2008: حريق المسرح القومى المصري - عدد الضحايا غير معرف - السبب: ماس كهربي (السبب المبدئي)

19-08-2008: حريق مجلس الشورى المصري - قتيل واحد و 17 مصاب - السبب: ماس كهربي

08-12-2007: حريق قاعة محاضرات بجامعة الأزهر فرع الزقازيق - 3 قتلى و 230 مصاب - السبب: ماس كهربي

19-11-2007: حريق بسيتي ستارز أكبر مجمع تجاري في مصر - قتيل واحد و 15 مصاب - السبب: ماس كهربي

01-05-2007: حريق سجن وادي النطرون - 3 قتلى و 15 مصاب - السبب: ماس كهربي

03-09-2003: حريق قصر ثقافة بنى سويف - 32 قتيل و 36 مصاب - السبب: ماس كهربائي

20-02-2002: حريق قطار الصعيد - 370 قتيل و مئات المصابين - السبب: ماس كهربي

في 6 سنوات كل البلاوي دي و السبب واحد ... ماس كهربي !!
لأ السبب مش الكهرباء - مالدنيا كلها منورة بالكهرباء من أمريكا لشونبونجو بتاعة التليو !!
السبب الإهمال ... حكومة مهملة ... نظام مهمل - مفيش أمن ضد الحرائق فالمبانى العامة يا غجر !!

الحمد لله إن النهاردة المسرح القومى كان أجازة - لو كنا يوم خميس كانت بقت كارثة بكل المقاييس ...
المسرح ده الخديوي إستلف من 130 سنة عشان يبنيه - عشان ينشر الثقافة ... الخديوي العثماني اللى مكانش بيعرف يتكلم جملتين عربي على بعض !!
مستنيين إيه يولع عشان تتحركوا - الهرم الأكبر !!!

حسبي الله ونعم الوكيل

٢٣‏/٩‏/٢٠٠٨

حبيب سميث ...



إمبارح وأنا بتابع أخبار المصريين والسياح اللي إتخطفوا و طلعوا بيهم على السودان مش عارف سرحت كده في تصور خيالي لو إن اللي حصل ده حصل في أمريكا مثلا ...
يمكن أنا لسة متأثر بالفيلم اللي شوفته أول إمبارح "ثلاثة عشر يوما" واللي كان بيحكي اللى حصل أيام أزمة أمريكا مع الإتحاد السوفيتي سنة 1962 المعروفة بأزمة صواريخ كوبا واللي كانت أقرب مرة يصل فيها العالم لمشارف حرب نووية بين القوى العظمى

الفيلم كان جامد قوى وهو بيبين المطبخ السياسي الأمريكي و طريقة إتخاذ القرارات وقد إيه الكل متحمل المسئولية و خايف على "الأمن القومى" للبلد و في نفس الوقت خايف من إندلاع حرب ...

المهم تخيلت إن السياح دول سياح مصريين في أمريكا و إتخطفوا مع سواقين ومرشدين أمريكان و"عسكري" في حرس الحدود الأمريكاني لما كانوا في سفاري في تكساس واللي خطفوهم هربوا بيهم على المكسيك ... (أظن الوضع شبه كده جغرافيا)


قوم إيه ... الأمريكان بعتوا فرقة قوات خاصة محمولة جوا مع يجي 6 طيارات من اللي بنشوفها فالأفلام و قاموا بعميلة "محدودة" أطلقوا عليها إسم "ولاد الكلب" فجروا فالعملية دي كل مواقع العصابات في شمال المكسيك و حرروا الرهائن و خطفوا كل أفراد عصابة القناع الأسود (فرع المكسيك) و حلقوا لدنجل (المكسيكي) شنبه و بعد كده "أعلموا" المكسيك (مش إستأذنوهم) إنهم قاموا بعملية محدودة لتحرير الرعايا الأمريكان المحتجزين في المكسيك (اللي هما السواقين و المرشدين السياحيين وعسكري حرس الحدود) ومعاهم المصريين المختطفين و لقوا قد سبعة طن هيروين وإنهم سلموهم للسلطات المحلية ...

كل ده أكيد حيحصل في أربع خمس ساعات بالكتير قبل مالتلفيزيون يسيحلهم وشوف يا أخي الفجر ... على الرغم من ده تمت إقالة اللواء أركان حرب "جون سميث" القائد الأعلى لقوات حرس الحدود الأمريكاني و إقالة وزير داخلية أمريكا " حبيب سميث" و إبتده الكلام يتنطور عن قدرات الحكومة الحالية و عن التجديد للرئيس الأمريكى الحالى "حسنى سميث" ...

.
.
.

مش عارف ... انا عمرى ما كنت من المروجين للنموذج الأمريكي و دايما مؤمن إنه لو لم أكن مصريا لوددت أن أكون "إسكندرانيا" مثلا بس السودان و تشاد بالنسبة لمصر عاملين زي المكسيك جنب أمريكا ... عيب قوى إننا لغاية دلوقتي معرفناش نجيب الناس بتوعنا من هناك !!


حاجة كمان - مفيش بني آدم فالحكومة دي فاهم حجم الفضيحة - إشحال إن ماكانش زهير جرانة أصلا راجل بتاع سياحة و شغال الشغلانة دي ... طب لو مش قادرين نبعت كام طيارة يمشطوا المكان ده طب مندفع وإحنا ساكتين !!
بحسبة بسيطة بيقولوا الحتة دي زارها السنة اللي فاتت حوالى 1000 سائح و بيتكلف الواحد فيهم حوالى 10000 دولار - يعنى الحتة دي بتدخل البلد (سواء في يد الحكومة أو في يد الأفراد) 10 مليون دولار ... يبقى ندفع الفدية أوفر و نحرر الناس و نشدد التأمين على الحدود في الحتة دي و منخسرش الفرخة اللي بتبيض بيضة دهب ...
يا عم ماهو ساويراس أهو ياما إتخطفله مهندسين في العراق و كان بيدفع عشان يحافظ على "سمعة شركته" اللي هيه أكيد مش في درجة أهمية "سمعة مصر"
كل ساعة بتعدي و إحنا قاعدين كده مش عارفين نتصرف بنخسر ... أي حد بيشتغل في السياحة في جنوب مصر حاطط إيده على قلبه و بيدعي عليكوا يا ظلمه ...

بجد بجد ... الله يحرقكوا !!!

٢١‏/٨‏/٢٠٠٨

شكرا جزيلا يا ولاد الكلب !!


يمكن أكتر من 90 % من الناس اللي يعرفوني ماسمعونيش بشتم قبل كدة - ويمكن البلوج ده اللي عطلان بقاله أكتر من سنة عمره ما إحتوى على شتيمة ... لكن اللي بيحصل ده ملوش عندي عنوان آخر محترم

مجلس الشورى ولع إمبارح - شكرا جزيلا يا ولاد الكلب ...

الموضوع منيل قوي ... النظام الحالى في البلد بيتهاوى من كل الإتجاهات ... خلاص مبقاش ينفع الوضع ده يستمر أكتر من كده !!

أولا: المبنى غير معد أصلا لإحتمال قيام حريق - فيه حاجة كده فالدنيا ... دي لو بوركينا فاسو مكانش مجلس الشورى / الشيوخ / البرلمان ولع بالشكل ده !

فيه 3 مصطلحات أي طالب هندسة في سنة تانية حافظهم ... مش ممكن الإدارة الهندسية (مهو اكيد فيه أم إدارة هندسية في مجلس الهباب ده) متكنش سمعت بيهم ...

1 - smoke detection: يعنى إستشعار الدخان ... يعني لو فيه دخان - شوية دخان مش حريقة بجد يرن جرس إنذار متصل بجهاز الدفاع المدنى والأسعاف و قسم البوليس اللى المبنى تابع ليهم ... ده أقل واجب ودي مش تكنولوجيا - ده إختراع كاسر ال 100 سنة دلوقتي ... عندنا مبانى من أيام الإنجليز ماكانوا فمصر من أكتر من 60 سنة فيها الإختراع الفزيييع ده !!
2 - fire fighting: يعني مكافحة الحريق سواء مانيوال (يدوي يعني) أو توماتيكي - والتوماتيكي ده برضه مش إختراع ... رشاشات مياه متوصله بخزانات مستقلة تقلل (مش توقف) إنتشار الحريق لحد ما المطافي توصل ... الناس في العالم كله مؤمنة إنه ممكن حريقة تحصل - ده شيء منطقي ... الفكرة كلها فكلمة "وبعدين" - حنعمل إيه لما الحريقة تقوم !
3 - fire rating: يعني تقييم كل مادة أو شيء مستخدم في بناء المبنى يقدر يصمد قد إيه لحد ميبتدي يتحرق ... نظريا أي مقاول مطالب بإنه يقدم شهادة fire rating لأي مادة مستخدمة في التشطيبات - الحكومة بتتشطر على الناس عشان تلم إتاوات لكن لما الموضوع يتعلق بالحكومة نفسها الموضوع يتحول لنكتة كبيرة ...

ثانيا: الناس غير مؤهلة للتعامل مع حريقة سواء على المستوى الفردى أو على المستوى الحرفي !

أحسن و أكثر التقارير تفاؤلا بتقول إن المطافي وصلت بعد ساعة ونصف - ده المستوى الحرفي ... معلوماتى المتواضعة بتقول إن الحريقة بيبان آخرها من أول ربع ساعة ... وكل دقيقة تأخير بتساوي نسبة خسائر أعلى ... لو فكرنا بالمنطق ده يبقى مفيش حاجة ممكن تتقال عن اللي حصل ده غير "صباح الفل"

المستوى الفردي ده راخر سهل جدا ... الكفاح اليدوي اللي مفيش أسهل منه ... طفاية الحريق اللي فى العربية وفي كل دور وأحيانا في كل أوضة ... زي ماحنا مركزين قوي في تأمين المبانى اللى زي مجلس الشورى - المفروض طاقم الحراسة و أغلب الموظفين بيكونوا واخدين دورات في إزاي يستخدموا الطفايه (علما بإنه مكتوب عليها إزاي تستخدمها ) - يعني برضه لو في أول ربع ساعة للحريقة حد من طاقم الحراسة كان إتشملل وشدله طفاية حريق وراح كسر الباب وخلص الليلة كان زمان الخبر بقى "حريق محدود بأحد الغرف بمبنى مجلس الشورى وطاقم الحراسة يسيطر على الموقف" - "وزير الداخلية يأمر بمكافآت فورية لطاقم الحراسة المسئول"

ثالثا: النظام المهتريء ... مفيش system ...

أراهن إنه نصف رجال مكافحة الحريق دول مبيعرفوش يقروا ولا يكتبوا ... مجندين أميين و النصف التانى يادوبك بيفك الخط ... أراهن إننا لسة بنطفى الحريق بنفس الطريقة اللي الناس كانت بتطفي بيها من 50 سنة ... ممكن نكون جيبنا عربيات مطافي جديدة بس حنطلع بنستخدمها زي أيام "إسماعيل ياسين في المطافي"

العساكر اللى إتصابوا - أغلبهم أصيب بإختناقات ... واضح إنه حتى زى رجل المطافى لم يتطور منذ زمن ... أو يمكن نكون بنوفر !!

أكيد فيه علم لمكافحة الحرائق والسيطرة عليها لكن اللي حصل ده والمدة اللى أخدوها عشان يطفوا أم الحريقة معناها إنهم شغالين بالبركة ... المبنى ولع بالكامل ... الحريقة خلصت عشان المبنى خلص ... كل اللي كان ممكن يتحرق ماشاء الله إتحرق بنسبة نجاح للحريق تصل ل 100 %

من الآخر ... أبوكم لأبوا المشغلكم يا ولاد الكلب - غوروا بقى - إنشاء يا رب المرة اللي جاية يولع بيكم

التسميات:

٨‏/٥‏/٢٠٠٧

I'm no Superman



Lazlo Bane - Superman

Out the door just in time
Head down the 405
Gotta meet the new boss by 8 am

The phone rings in the car
The wife is working hard
She's running late tonight again

Well
I know what I've been told
You gotta work to feed the soul
But I can't do this all on my own
No, I know I'm no Superman
I'm no Superman

You've got your love online
You think you're doing fine
But you're just plugged into the wall

And that deck of tarot cards
Won't get you very far
There ain't no hand to break your fall

Well
I know what I've been told
You gotta know just when to fold
But I can't do this all on my own
No, I know I'm no Superman
I'm no Superman

That's right

You've crossed the finish line
Won the race but lost your mind
Was it worth it after all

I need you here with me
Cause love is all we need
Just take a hold of the hand that breaks the fall

Well I know what I've been told
Gotta break free to break the mold
But I can't do this all on my own
No I can't do this all on my own
I know that I'm no Superman
I'm no Superman

Someday we'll be together
Someday, someday
Someday we'll be together
Someday
I'm no Superman

٢٩‏/٤‏/٢٠٠٧

كل سنة و انت طيب و عقبال مييت سنة


القاهرة - عقد شيخ الأزهر الدكتور محمد سيد طنطاوي قران جمال مبارك - الأمين العام المساعد للحزب الوطني الديمقراطي وأمين السياسات بالحزب - على خديجة محمود الجمال - ابنة مقاول مصري ثري - في حفل عائلي خاص بدار القوات الجوية. ومن المقرر ان يقام حفل الزفاف في مدينة شرم الشيخ يوم الرابع من مايو القادم. وقالت جريدة الشرق الأوسط إن الاحتفال بالزفاف سيكون في منتجع شرم الشيخ، المكان المفضل لدى الرئيس مبارك.

ده عشان توفيرا للمصاريف و تورته واحدة كبيرة و مش عايزين زحمة و لمة و بتاع و يالا حالا بالا حيوا ابو جمال و بعدين ..ماسموش منتجع شرم الشيخ..اسمه عزبة ال مبارك

بس هوه الأستاذ جمال يبقى إبن ميين في مصر ... يعني إشمعنا المدام إلي كاتبين باباها بيشتغل إيه وغني و بتاع ... إيه العوج ده !! – معلهش ياخويا – البنات طول عمرهم غاويين منظرة ... إنت بس إدبحلها القط من أول يوم (أو أسامة سرايا مش فارقة كتير) وهيه حتمشي عالعجين متلخبطوش وترضى بقليله وتعيشوا بمرتبك ...


ورغم رغبة عائلة مبارك أن يكون الحفل عائليا محدودا ولا يحضره سوى أفراد العائلتين إلا أن إصرار والد العروس محمود الجمال على أن يكون حفل زفاف كريمته الوحيدة خديجة، التي يدللها صديقاتها باسم (موني)، حفلا كبيرا يليق بها وبمكانة عريسها، دفع جمال للرضوخ لهذا المطلب.

مون ايه مون مين؟؟؟؟؟؟؟؟ وبعيدن الله يسامحه كسر بقلوب بنات مصر كلهم..كل ده عشان بتتكلم عنجليزي حلو حبتين جامعة اميريكة و حركات...زغرطي يا بنت منك لها بالانجليزي

وبعدين متأخذنيش يعني ... كان لازمتها إيه المصاريف وشرم الشيخ منتوا كنتوا حلوين وكتبتوا الكتاب في الدار ... أنا عارف إنهم بيعملوا خصم لعائلات الضباط و المحاربين القدماء في الحتت دي – لكن في شرم الشيخ ... كتيير يا جمال – مالها الأزهر بارك و لا حتى فالبيت عندوكو ... مش عارف – معجبتنيش فالحتة دي .... يالا نقول إيه – البنت نفسها تفرح برضه.

وأضافت الجريدة: أن حفل الزفاف سيبدأ ظهر يوم الجمعة المقبل باجتماع عائلي ينضم إليه الأقارب ثم يقام في المساء حفل موسيقي، من المنتظر أن يحيه المطرب عمرو دياب، وهو صديق مقرب من علاء مبارك الشقيق الأكبر لجمال، وهو أيضا المطرب المفضل لدى العروس وصديقاتها.

عمرو دياب؟ مش عمرو خالد يعني..له في ذلك حكم يا علاء باشا

أيوه يا عم – علاء مظبتك ... أشكر أخوك بقى – لولاه مكنتش حتعرف تجيبلها عمرو دياب ولو عملت إيه ... وانتي يا (موني) برضه تشكري أبيه علاء وتبوسي راسه ووصي البنات بقه مش عاوزين فضايح – إحنا مش في بيانكي

كما يحيي الحفل الفنان هاني شاكر وهو المطرب المفضل لدى السيدة سوزان مبارك والفنانة أمال ماهر التي تبناها الرئيس مبارك فنيا منذ طفولتها.

ايوة..اكتر اتنين بيغنوا اغاني في حب مبا...يوه قصدي مصر مصر.وعشان كدة احنا اختارناااااااااااهم
انا لسة فاكرة اول مرة امال ماهر طلعت..بالفستان الازرق و الشال اللي كانت محتاسة بيه..و كانت حفلة لستة اكتوبر و حاضرها ياسر عرفات الله يرحمه..و يرحمنا

ياختشي كماله أمه - ياختشي كماله أمه !!!


ومن جانبه قام رجل الأعمال والمقاول الشهير محمود الجمال والد العروس، بالإشراف على تجهيز شقة الزوجية التي اشتراها جمال مبارك في حي الزمالك مؤخرا حتى تكون عشا للزوجية، وبالتالي سيترك حي مصر الجديدة الذي ولد وعاش فيه مع أسرته.

مانشيت الاهرام سنة 2010: خرج سيادة الرئيس جمال مبارك من قصره الجمهوري الجديد بالزمالك بتدريب ابنه شادي علي ركوب حنطور هزم الهكسوس

ليه بس كده – طب بجد زعلت ... يا جمال بابا و ماما كبروا و محتاجينك دلوقتي جنبهم أكتر من الأول و انت عارف السكة من الزمالك لمصر الجديدة قد إيه صعبة – كفايه يا عم الوقفة على كوبري أكتوبر ... برضة ماما كده حتغير لما تروح تسكن جنب حماتك – حاول بقى تبقوا تيجوا تباتوا عندهم خميس وجمعة و أهو تنزل تصلي مع بابا و تتغدوا سوا كلكم

وتمت خطبة جمال مبارك (43 عاما) وخديجة الجمال (24عاما) في أوائل العام الماضي.وتبلغ خديجة محمود الجمال من العمر أربعة وعشرين عاما، وهي حاصلة على شهادة جامعية في إدارة الأعمال بالجامعة الاميركية في القاهرة.

تفرق ايه عن اي بنت فيكي يا مصر...شوية الانجليزي..ما قلنا زغروطي ياللي مانتيش غرمانة

ياااه ميين كان يصدق ... أخيرا ... غلبونا معاهم الولاد دول – كده خلاص قلبي إرتاح والأستاذ جمال كمل نص دينه (ربنا يكرمه بقى فالنص التاني)

ويؤكد المقربون أنهما يتفقان في الآراء حول القضايا السياسية كما يتشاطران الاهتمام بالرياضة والموسيقى.

اه موضوع انهم متفقين في الارائ السياسية ديه يقلق الصراحة...يعني..ده معناه انهم بيخططوا والله اعلم ان يكون عندهم ولد بامبينو صغنون يسموه شادي...و يلبس تاج من وهو صغير و ع البافته مكتوب "اي لاف ايجيب"

يا عم قول ماشاء الله ... دانتوا عنيكو وحشة قوي – ربنا يكرمهم كده ويفضلوا متفقين على طول ... وبعدين ماهو جمال طول عمره من مركز شباب الجزيرة لساقية الصاوي للأوبرا لنادي الترسانة – ماشاءالله عليه من صغره


وتعرفت العروس على جمال أثناء مؤتمر عقد العام الماضي بالجامعة الامريكية وتكررت لقاءاتهما في اطار العائلة، خاصة ان اثنين من أقاربها يرتبطان بصداقة قديمة مع جمال مبارك.

جواز صالونات ده ولا ايه؟ ..اااه جواز مؤتمرات تفرق اصلها

أيوه يا عم ... جامعة أمريكية و حركات – طول عمرك ماتوقعش إلا واقف يابو جمال


أما عن والد العروس فهو محمود الجمال رجل اعمال ومقاول بدأ العمل مبكرا منذ تخرجه في كلية الهندسة.وتعود أصول خديجة الجمال إلى عائلة عريقة في مدينة دمياط شمال مصر وتحديدا إلى قرية منشأة الجمال.

ايه ده..المنوفيه ح تتشال من ع الخريطة الجغرافية لمصر ولا ايه!..بس علي كدة جابوا العفيش تفصيل من دمياط...شباب مكافح بصحيح...وعلي كدة فرشوا كام اوضه..العريس عليه المطبخ فاضي اوعي يكون ضحكي عليكي..و يجعله عامر

أوبااااا – وقعت في دمايطة !! ... خد بالك بقى – أكيد مدفعينك مهر يا معلم و حيظبتوك فالموبيليا – هات معاك حد بيفهم فالخشب و انت رايح معاهم ... مش عيب يعني بس اصل دمياط فيها كل حاجة من أول ألف لخمس تلاف جنيه و إفهم انت بقى مش حفسر عن كده !

-----------

الإسود: مقالة من مصراوي
الأحمر: مشاركة من إيبيتاف صديقة البرنامج
البرتقالي: جدو إسكندر (قبل القبض عليه)
.
.
.
ربنا يستر !

٢٣‏/٤‏/٢٠٠٧

I'm Back !

بقالي مدة مكتبتش - آخر مرة كتبت فيه حد حرق دمي فا محبتش أرد عليه وقولت أستنى أكتب بعد ما أروق ... بعد كده إتكلفّت في الشغل كالمعتاد فا المدة طولت ...

أول أول إمبارح (البوست ده بايت) كان يوم لطيف الحمد لله مليان أحداث حلوة فا أنا في المود إني أكتب شوية ... نبتدي بفقرة الإهداءات للمناسابات بتاعة إمبارح 20 - 4 - 2007

كل الناس:
كل سنة و انتو طيبين - المولد النبوي بالتقويم الميلادي (ميلاد الرسول كان موافق 20 ابريل)

ماما: كل سنة وانتي طيبة و عقبال مييييييت مليون سنة :)
علي:
ألف مبروك يا " شاركي" - ربنا يتمم لكم على خير إنشاء الله - وآسف جداااااا إني مقدرتش أحضر إمبارح (كان لازم أسافر القاهرة و بعد العشاء كان صعب قوي - إسأل " لطف" أنا كلمته أتأكد من الميعاد حتى)

أحمد و هبة: ألف ألف مبروك ماي نيو فريدنز و ربنا يتمم لكم على خير إنشاء الله - بجد إتبسطت قوي معاكم إمبارح
الأهلي:
بييب بييب - آااهلي !

هتلر:
هابي بيرث داي تو يو يا معلم :)

تحديث:
رامي: ألف ألف ألف مبروك يا باشا - أخيرا ;) - ربنا يتمم لكم على خير إنشاء الله

إيه بقى اللي حصل !

أنا كنت كتبت بوست لمها في 14 فبراير اللي فات - وعلى الرغم إنها مكانتش مبسوطة إني عملتله "ببليشينج" عشان دي خصوصيات إلا إني كنت شايف - ساعتها - إنه مفيهاش حاجة يعني

بعدين علا إتعرضت لحادثة كدة فا عملت بوست تاني - تقريبا في نص مارس - حطيت فيه صورة لينا و إحنا صغيرين ...
و أنا بدور على الصورة دي في ألبومات صورنا و إحنا أطفال لقيت صورة بتجمعنا أنا و علا مع قرايب لينا كلهم بلوجرز دلوقتي - صورة من حوالي سبعتاشر سنة تقريبا ...
أنا إعتقدت إنها فكرة لطيفة إني أحط الصورة دي في بوست لوحده و أشير لكل فرد و أكتب البلوج بتاعه ...

لحد هنا و الموضوع أهبل الغرض الرئيسي منه إني أعاكس علا و أعاكس قرايبي لما أحط صورة لينا و إحنا أطفال سذج ...

هوب - إبتدت التعليقات ... الأول حد مفهمتش تعليقه صح و بعتله على الميل أراجعه في اللي كاتبه و هوه مشكورا فهمني قصده و إني ظالمه و إعتذرتله و شكرا و معملتش ببلشينج للكومنت أصلا

ويعدين أحد أفراد الصورة رد رد بايخ قوي - شاط يعني - معترضا على نشر الصورة و إني بكده بفضح شخصيته اللي هوه مخبيها ! و إنه أكيد مش عاوز الناس تعرف هوه مين ! و شبِه ده بإني حاطط شرط إن الكومنتس عندي تكون بعد موافقتي و إن ده أكيد عشان نفس السبب !!
وبما أني مش من هواة خلق عداوات بدون داعي و مش من هواة دخول معارك ليس لها أهميه و مش عاوز أقفش على حد قمت ماسح البوست ده أبو صورة و البوست بتاع علا و البوست بتاع مها كمان ...

بعد كده جاء موضوع الإستفتاء و التعديلات الدستورية و حطيت مييل جالي على البلوج بس من غير نفس ...
أخيرا جالي كام تاج من إيبيتاف وبما إن تاجز إيبيتاف على عيني و راسي فا لازمن ولا بد أعملها و بما إني كان عندي كذا تاج متأخرين - يبقى أبتدي أعمل شوية من التاجز دي - شوية شوية لحد ما يخلصوا :)

تحذير: البوست ده ممل للي ملوش في موضوع التاجز ده ... أكرر - البوست ممل عشان محدش يرجع يشتكي فالآخر :)

التاج الأول: انت ميين انت - انت ميين قولي



أول مرة عملته بأقل عدد اسئلة طلعت غاندي ! بس لما زودت الأسئلة طلعت صدام حسين !!!
أنا كان تحليلى إني غاندي إلي أكتشفنا في الآخر إنه تحول ليصبح صدام حسين ومعت أكدت على الموضوع ده ...
لما جيت أعمله تاني المرة دي عشان الست إيبي طلعت أول مرة بيل كلينتون (محدش يفهمني غلط) و لما عملته باسئلة أكتر طلعت صدام حسين برضه ! ... إيه الحكاية



التاج التاني: مالك متنح كده ليه :)

التاج ده غريب قوي - إيه الهواية اللي باستغرق فيها تماما لدرجة ان ماما و بابا و الاسرة بسهواج و محمدين بالقاهرة و علا بالاسكندرية و تيتة بدمنهور ينادوا عليك و انت و لا علي بالك؟؟؟

مش عارف بصراحة ... يمكن لإني إتعودت أعمل كذا حاجة في وقت واحد !!
بس أظن الهواية الوحيده إالي ينطبق عليها ده هية النوم :)
وأنا نايم لو مين نده عليا مش حعبره
:)

التاج الثالث: عشنا وشوفنا !

التاج ده مليان أسئلة غريبة هوة راخر - بس وماله - لما نشوف


SECTION 1 - Last 1s?
1. last beverage?
سيكم عشان البرد

2.last phone call?
مدير إنتاج المصنع بسأله عن نوع معين من الخشب دخل المصنع ولا لسة

3.last instant message?
حديث من 1133: وإن الرجل ليصدق حتى يكتب عند الله صديقا ... ص

5. last cd played?
كان دي في دي - سكربس سيزون 4

6. last time you cried?
كالعادة - رمضان اللي فات

7.last text message?
كورتيكو صديقي الأنتيخ بعتلي ميل بعنوان "فاكرك يا واد" و بيقولي إنه عمل عمرة يوم الخميس اللي فات و إنه دعالي أول حد و قد إيه الكعبة جميله قوي و مكة و المدينة لما تروح هناك حتنسى الدنيا و ما فيها و إن شاءالله ربنا يكتبلنا الحج سوا

SECTION 2 - مسخرة?
1. dated someone twice?
أكيد طبعا ... :)

2. been cheated on?
ممم - إي دونت ثينك سو

3. kissed someone & regretted it?
هيه الحاجات دي بقت بالساهل كدة !!!


4. lost someone special?
أي شخص أكيد بيبقى سبشيال بطريقة أو بأخرى - يبقى أي حد فقدته سواء بسبب إنه توفى أو معادتش علاقتنا ببعض زي زمان وخلاص لأي اسباب دنيوية ينطبق عليه الكلام ده !! - بس الحمد لله محضرتش اي جنازت في الفترة الأخيرة و مأظنش قفشت على حد برضه :)

5. been depressed?
هوهوهووووه - ومين مش بيكتأب فالزمن ده يا رجالة

6. been drunk and threw up?
ثريو آب أكيد لكن درنك - نو واي يا عم ... إحنا مسلمين الحمد لله

Section 3 -
List 3 Favorite Colors
برتقالي
كحلي
إسود

Section 4 - This month have you.
1.Made a new friend?
مممم - أه ... الحمد لله و سعيد قوي بالنيو فريند ده :)

2. Fallen out of love?
لووول - الحمد لله حياتي العاطفية مستقرة ... ربنا يباركلي فيكي يا مها

3. Laughed until you cried?
مأظنش لدرجة الدموع بس ضحكت من قلبي أكيد

4.Met someone who changed your life?
مش بيبان فيوم وليلة يعني - بس أنا كل يوم بقابل ناس جديدة ;)

5. Found out who your true friends were?
غريبة دى قوي - ده حصل فعلا :) ... لطفي بعتلي مسج طويلة من روسيا بيسأل عليا و على أحوالي - مع إنه المفروض العكس! عادل بعتلي مييل من الكويت بيقولي على العمرة اللي عملها و إنه دعالي وبيسأل عليا بصفة عامة - مع إنه المفروض العكس !

6. Is there something you want to tell someone?
بحب اقول لهم في وشهم :)

7. Would you kiss anyone on your top friends?
لوووول - مفيش الكلام ده ما بين الرجالة يا معلم :)

8. How many people on your top friends do you know in real life?
تقريبا كلهم ما عدا حد واحد أو إتنين بالكتيير

9. How many kids do you want to have?
ربنا يكرمني يا رب :) ممكن بنت و ولد ... ممكن بنتين و ولد ... وأكيد طبعا كل اللي يجيبه ربنا كويس

10. Do you have any pets?
لأه - أكفل يتيم أحسن و أنفع - قال حيوانات أليفة قال :)

11. Do you wanna change your name?
نو واااي - أنا بحب إسمي قوي ... مرة واحدة قالتلي إنت شكلك "أحمد" - إتبسطت قوي ساعتها

12. What did you do for your last birthday?
ممم - مفيش جديد الصراحة بس كنت سعيد قوي لإن أهل بيتي و خطيبتي كانوا معايا و إني إحتفلت بيه في إسكندرية

13. What time did you wake up today?
تسعة صباحا - ونمت إمبارح 3:45 صباحا برضه ... اي خدمة

14.What were you doing at midnight last night?
كنت في مطعم عائم في الزمالك بحتفل بكتب كتاب صديقين جداد ليا

15. Name something you CANNOT wait for?
نتجوز أنا و مها بقى :)

16. Last time you saw your father?
إمبارح الساعة 7 و ربع و أنا نازل رايح أركب القطار للقاهرة

17. What is one thing you wish you could change about your life?
ممم - مش لاقي حاجة دلوقتي !! - الحمد لله على كل حال

18.What are you listening to right now?
نجلاء - مندوبة مبيعات عندنا عملالي شنيور فدماغي - حد يشيلها من قدامي (أنا بكتب و هيه قعدة قدامي بتمارس هوايتها المفضلة بإنها تصدعني)

19. Have you ever talked to Tom?
مييين - مش فاهم ... توم مين إنشاء الله

20. Have you ever talked about someone behind their back?
للأسف أكيد عملتها - كلنا بنعملها ... بس بحاول دايما يكون بالخير ... قولو يا رب

21.What’s the last piece of clothing you borrowed from anyone?
لوووول - حزام إسود - أخدته من عمرو أخويا لما نزلت إسكندرية و إحتجت واحد و إكتشفت إني معييش واحد في شنطتي و لا في دولابي في إسكندرية

22.Who’s getting on your nerves right now?
دلوقتي دلوقتي - مندوبة المبيعات السابق ذكرها ... هيه لسة قاعدة ليه حد يفهمني بس !!!!

23. Most visited web page?
مصراوي - كل حبة بشوف إيه آخر أخبار الدنيا و البلد على الفرونت بييج بتاعتهم

24. Coke or Pepsi?
أكيد بيبسي - بس أنا أخدت قرار الخميس اللي فات إني أبطل مشروبات غازية ... ربنا يقويني

25. Mac or PC?
ملياش فالماك بصراحة - بس كل اللي ليهم فيه بيضربوله تعظيم سلام ... أنا مقدرش أفتي!

so to whom I will send the tag ??????!
فوكك :)

٢٥‏/٣‏/٢٠٠٧

forwarded mail:تعرف ايه عن التعديلات الدستورية ؟



مين فين ما سمعش ان فيه تعديلات دستورية؟

لكن ....محدش اهتم ..!؟

ليه يا عم ....؟

ماهى أصلها خربانه ...خربانه

طب خد عندك

هى مش خربانه وبس

هى هتبقي معتقل كبير

ولا تقولى جوانتانامو ولا حتى ابو غريب

تعال نحسبها سوا...ونشوف التعديلات بتقول ايه

وسيبك من المادة التانية اللى قعدوا شغلونا بيها علشان ما تخدش بالك بالخوازيق التانية

معلش استحملني اصلى طهقان



بص يا عم ...المادة 24 و 25 اتعدلوا

يعني ايه ؟

إلغاء الدعم عن السلع والخدمات


طب يلغوها ليه والضرايب اللى بندفعها

يا عم اسالهم هما مش عدلوا الدستور وانت هتوافق هتوافق


وخد عندك....؟

ايه تانى

قانون الطوارى اللى بقلنا اكتر من 25 سنة مستنينا يلغوه

وخصوصا اننا مش فى حالة حرب وسمن على عسل مع اسرائيل


ماله هو كمان

حط مكانه قانون الارهاب يعني هيفتشوك بالدستور وهيدخلوا بيتك وهيوقفوك بالدستور وكمان هيدوك على قفاك بالدستور ..والعملية هتبقى شرعية ما هو ده الدستور اللى حضرتك استفتيت عليه



ولو شغال فى الحكومة او فى شغل خاص

الدولة ظبطتك

ازاى

بالمادة رقم 37 و65

التعاقد السنوى وسلطة الفصل المباشر


اللى من خلالها يمكن فصلك لو قلت ان فيه فساد او اعترض على رشوة وهتبقى فى الشارع ياحلو او تسكت وتبقي بعقد وحياتك مش هقولك كف عفريت لان العفريت ممكن يرحمك على كف مديرك اللى ممكن يخليك فى الشارع



والدولة مالهاش دعوه بيك

ليه؟

عن طريق المادة رقم 39 و 73

إعفاء الدولة من أى إلتزام نحو العاطلين



اما اذا كنت مش مصدق ان فى عملية توريث فصدق ولو عاوز تتاكد فاقرا المادة رقم 76

وساعاتها هتنتحر او ممكن تموت بالسكتة القلبية قبل ماتنتحر وتغضب ربك



اما المادة 77 فهى المصيبة الكبري وهى اى واحد هيجي يحكمك مش هيسيب الحكم قبل مايخلص عليك اوانت اللى هتخلص عليه

وللعلم فى كل دساتير العالم هذه المادة تنص على ان الرئيس يظل فى الحكم لمادة فترتين فقط الا الدستور المصري

الرئيس يظل فى الحكم الى الابد

اللى خايف منه انهم يعدلوها ويخلو الرئيس يظل فى الحكم حتى بعد مايموت


اما اذا كنت مصري مسلم فيطلعوا عينك

انت تبع مين وجماعة ايه لو نسيت تحلق دقنك الصبح وانت ماشي او لقوا فى جيبك سواك وانت حالق دقنك حتى



ولو كنت مصري مسيحي فانك هتبقي مستعبد مرتين مرة من الحكومة ومرة من الكنيسة وماقدمكش إلا حل من 3حلول

انك تعلن ولاءك للكنيسة والا هتبقي هرطقة - بالبلدى كفرة وماتشغلش مخك

او تتكلم ويقولوا عليك مجنون ويخدوك مستشفى المجانين

او تبقي مسلم وديه هتبقي مصيبة لان الدولة هتعتقلك



اما لو كنت ممن يامل فى تعليم مجانا وعلاج مدعم ومن المعدومين زى حالتنا فإنسه .... يا بابا

الكلام ده كان زمان

المادة 108 المعدلة لاغيتلك كل ده

لتقلص الدعم لهذه الخدمات والدفع لعمل كيانات بديلة إستثمارية .

وجابتلك رجال الاعمال اللي هيموصوا دمك ويمكن تبيع عليهم الشقة والفرش ويمكن اعضاءك كمان



اما السياسة فخلاص خلصت اللعبة انت دلوقتى هتبقى متفرج حتى لو وصلت لدرجة محترمة من التعليم

لان المادة 5 و76 قفلتلك كل ده

وقصرت المشاركة على احزاب البطيخ والطربوش



على فكرة التعديلات كتيرة

لكن ان اتخنقت واحبط من شكلها



اللى عاوز اعرفه دلوقتى

هل الشعب المصري فيه رجالة هيقولوا ....لالالالالالالا

الكلام ده اللى هنشوفه يوم الاستفتاء



وخلى بالك لو مقولتش ( لا ) دلوقتى



مش هتعرف تقول( لا) طول حياتك


Forwarded by Minas Adel

٢٢‏/١‏/٢٠٠٧

لم يصبه الدور !!


يوم الجمعة قبل اللى فاتت كان آخر يوم لي في الثلاث سنين التأجيل اللي كنت واخدهم من الجيش يعني لازم اقدم نفسي من تاني للجيش يشوفوا ليهم غرض فيه المرة دي ولا حيأجلوني تاني و لا إيه نظامهم بالضبط ...

أيام ما أخدت التأجيل ده كنت متخرج من يجي ست شهور ... بشتغل ومظبط حالي آه بس كان إحتمال دخولي الجيش منطقي وكنت مستعدله نفسيا - حضيع سنة من عمري أو ثلاث سنين بس أنا لسة في أول حياتي - مش أزمة كبيرة يعني ...

المرة دي الوضع مختلف تماما - دلوقتي أنا كبرت وبقى عندي 26 سنة ... بشتغل شغلانة كويسة و في مكان كويس ... خاطب و بستعد للزواج - يعني من الآخر دخولي الجيش دلوقتي يعد كارثة حياتيه بكل المقاييس ...

ببساطة - حأضطر أسيب الشركة - يعني حيتوقف دخلي تماما (الجيش بيدفع مرتب شهري 60 جنيه !!) - حبتدي أصرف من مدخراتي أصلا ... ولما أخلص مستحيل ألاقي مكاني في الشركة لسة فاضي ومستنيني ... الجواز حيتأجل لأجل غير مسمى (عقبال مألاقي وظيفة من تاني) - إلخ إلخ إلخ ...

طبعا وسط الأفكار السوداوية دي كلها كان لازمن ولابد لما أفتح التلفزيون ألاقي قدامي عبود عالحدود فيلم السهرة ليلتها اللي هوه فال حلو قوي قوي قوي - أنا قلت في بالي "قل لن يصيبنا إلا ما كتب الله لنا" ... أنا مش ضد الجيش - أنا ضد أي حاجة تيجي في وقت مش وقتها خالص ... زي أخو واحد صاحبنا الكبير اللي أخدوه عالجيش بعد ما كان متأجل كذا سنة فالوقت اللي كان إتجوز فيه و جاب "عبدالله" كمان (عقبال عندكم!)


المهم - أنا إتكلت على الله و صحيت يوم السبت من بدري متوجها صوب منطقة التجنيد في العامرية ...

السيناريو بتاع زمان أيام ما كنت في المصنع قبل ما أنتقل للعمل هنا في القاهرة ... تاكسي للموقف الجديد - ميكروباص للعامرية وسط الزحمة و الزق و الحشرة في عربيات مستحيل حد يصدق إنها لسه بتمشي لحد دلوقتي و سايقها سواقين مجانين بيسبوا بالدين وهما مشغلين إذاعة القرآن الكريم - والعركة الشهيرة كل يوم بين سواقين الميكروباصات والركاب حول ما إذا كانت الكنبة اللي ورا بتاخد ثلاث ركاب ولا هية تم تصميمها - حسب قناعاتهم جميعا - عشان تاخد أربعة رفيعيين ! (ياخد عدوينكم يا رب)

قام الميكروباص اللي كان بيحمل "تجنيد - تجنيد" وهوة مليان شباب زي الورد و كله ماسك المصاحف و قاعد يدعي يا رب مش طلباها جيش خالص اليومين دول ...

وصلنا منطقة التجنيد - مشيت حبة حلوين لحد البوابة الرئيسية ... عسكري أليط واقف عالباب يرد على كل سائل بمكان دخوله ... بتوع التأجيل - آخر بوابة ... المترحلين - آخر بوابة ... الدفعة الجديدة - آخر بوابة ليكتشف الجميع في النهاية إنه كله من آخر بوابة !!

الساعة كانت تسعة الصبح و الشمس لسة مشدتش حيلها وإحنا في الخلاء تقريبا فا لكم أن تتخيلو يعني إيه بقى ساقعة (بررررر بجد يعني !)

إتمشيت للبوابة اللي شاور عليها الأخ العسكور لأفاجىء بطابور سادد عين الشمس ... الطابور باديء من عند البوابة المذكورة بمحاذاة السور مسافة 50 متر كده و بعدين ينقلب بزاوية تسعين درجة وينطلق في عمق الخرابة إللي قدام منطقة التجنيد مسافة لا تقل عن 100 متر تانيين - كل دول بني آدمين ! ... ده غير 500بني آدم تقريبا متجمهرين عند البوابة!!


يعني إللي كانو موجودين لا يقلو عن 1000 بني آدم بأي حال من الأحوال و الناس عمالة تتوافد (الباتش اللي أنا جاي فيها على سبيل المثال لا تقل عن خمسين شاب)

أنا قلت اليوم إضضرب و إنسى موضوع السفر النهاردة على وسط النهار يا عم المتفائل و أدينا واقفين لحد مايكروشونا - ولا مايكروشناش محنا واقفين فالخرابة - طبعا الناس اللي واقفه دي كلها أكيد فيهم بايتين من إمبارح أو أقلها صلوا الفجر في الخرابة !

الإشاعات قاعدة تتناثر إنهم بيدخلوا إتنين إتنين ! ... و إنه مفيش حد دخل من الصبح وطلع تاني (الله يطمنكم يعني) ... أنا قلت صامدون صامدون ... محناش اقل من طلبة الأخوان في جامعة الأزهر ....

شوية ولقينا عربية كارو بحصان و اللي تكشف لي بعد كده إنها مركبة غير مجنزرة تابعة لوزارة الدفاع بتتقدم نحو منتصف الخرابة و عليها إتنين مجندين بالزي المموه بتاع الصاعقة - أي والله - ومحملين العربية قزاير كوكاكولا وبسكوت و حركات من دي و واقفين ولا بياع الكازوزة في السنيما في الثمانينات ... تن تتن تن - بييبس ... تن تتن تن - بيييييبس ...

شوية كمان و جه واحد لابس ملكي و معاه ستاند كلنا حافظين شكله مكتوب عليه 75 قرش بخط كبير و سرعان ما إختلط صراخه المحموم بصراخ المجندين االسابق ذكرهم.. موباااايل - موبااااااااااايل !!

كل ده وإحنا لسة في الخرابة إللي قدام سور منطقة التجنيد ...

.
.
.

مرة واحدة - وبدون سابق مقدمات ظهر عسكري فوق السور (أيوه - فوق السور ... لا قدامه ولا وراه) قال حاجة بسرعة و نط جوه المعسكر تاني ... طبعا مستحيل كنت أسمع قال إيه أنا أو أي حد من اللي حواليا على بعد 120 متر من مكان ما طلعلنا لنفاجىء بحدوث تخللخل سريع في الصفوف الأمامية و ناس بتجري ناحية البوابة ليختفي الطابور في لحظة و يتجمع أكتر من 1000 شاب حوالين البوابة ...

أتاري الأفندي طلع قال مش حناخد بالطابور !! كل عشرة يلموا الورق من بعض وعشرين جنيه من كل واحد و يبعتوا واحد بس بالمتين جنيه والورق يخش يجيب إستمارات !!


صباح القرارات الذكية ... باظ الطابور يأبو جهل ...

طبعا مستحيل ألاقي عشرة أعرفهم في الزحمة دي - وأكيد مش أنا بس اللي كده !!

المهم بعد ما خربوها إهتدى الناس إنه أي حد متطوع إبن حلال يقدر يدخل وسط الزحمة ويجيب الإستمارات دي ياخد الفلوس و الورق ويتوكل عالله ... حظي وقع في ولد بسيط كده و طيب إسمه آدم ... واضح من لكنته أصوله الريفية
آدم أخد الورق و الفلوس ... نمرتك كام يا آدم عشان نتابعك من برة ... آدم معهوش تليفون ... طب حنعرف إزاي إنك طلعت يا آدم في الزحمة دي ... آدم قال إستنوني جنب السور بعد الزحمة على طول ...

ساعة ... ساعة ونص ... الزحمة بتزيد ... و آدم لسة جوه !!

فيه ناس كانت إبتديت تطلع ومعاها ورق أخضر كدة - الواحد فيهم يجري يقف فوق أي طوبة فالخرابة ويقعد ينادي على الأسامي اللي فالورق اللي معاه ... الموضوع إحتاج مني تلت ساعة عشان أكتشف إنه دول المستجدين (على إعتبار إننا خبرة وواخدين تأجيل قبل كدة)


طب آدم ... انت فيين يا آدم؟؟

شوية كمان و طلع صول معاه فرع شجرة و قعد يشتم فالناس اللي واقفة - شتيمة شتيمة يعني من أحط ما يكون ... شتيمة بالأهل و الدين - والناس على أخرها فاليوم اللي ملهوش ملامح ده لحد ما قرر "سيادة" الصول إننا كلنا ندخل من الباب مجموعات ... الأول أمثالي اللي مستنين آدم و أصدقاءه اللي بقالهم ساعتين جوه و بعدين الناس اللي جابوا الإستمارات دي فعلا !

الناس اللي دخلت و أنا منهم وقفنا عدة طوابير جنب بعض (نظام فطري) قام جه شوية عساكر و طلبت معاهم يخربوا الطوابير و يعملوها تاني من أول وجديد وسط زق و قلة أدب أصبحت مكررة !

شوية دخل الصول أبو فرع شجرة ... معجبوش إزاي الشباب المؤهلات العليا اللي شكلهم محترم دول يبقوا واقفين طوابير ... فا قرر أنه كله يقعد على الأرض في مكانه ! ... محدش إشتكاله - بس هوه حابب يبالغ في مرمطة الناس اللي موجودين ...


وإحنا قعدين نسب و نلعن إذا بالأخ آدم يظهر بعد أن مر على وجوده بالداخل حوالي ساعتين إن ماكنش أكتر و هوه متفرهد و إبتدا يوزع علينا إستمارة و شوية ورق صغير متقطع مكتوب عليه فئات نقدية (أربعة جنيه - جنيه و نص ... كده) و 2 طابع تنمية (عشرين قرش) + ورقنا اللي بعتناه بيه ...

طبعا مكنش فيه حيل عشان حد يسأله كنت بتعمل إيه كل ده و لا عملوا فيك إيه ... كل واحد أخد الورق وهوه ساكت بس لفت إنتباهي أنه مجموع القيمة الأسمية للورق اللي معايا كان 8.5 جنيه بس مش عشرين ... ده غير التحذير العجيب من إن حد يملىء الإستمارة اللي إن ماخانيش التقدير بتاعة حاجة تانية خالص غير اللي أنا رايح عشانه ....

وأنا واقف قابلت بالصدفة واحد كان معانا في الكليه بس في ميكانيكا معاه الورق و تايه زيي مش عارف إيه الخطوة اللي عليها الدور - إقترحت عليه نسأل عميد كان واقف يتشمس ... إحتمال يكون عارف ..
وإحنا رايحين له عدى جنبنا عسكري شايل شوية ورق فا رفيقي بطيبة قلبه سأله بمنتهى الزوق المفروض نعمل إيه دلوقتي ... قام العسكري الفاضل أشاح بوجهه و شوح بإيده وسابه ولا كإنه بيكلمه ...

قولتله سيبك منه و خلينا فالعميد ده - رحنا له ... سألناه - الراجل رد بكل زوق و أدب علينا (شكلنا مهندسين و ولاد ناس يعني مش صييع) و قالنا نروح الساحة الفلانية ندور على الشخص اللي معاه ورق القسم بتاعنا و ناخد منه موقفنا الجديد و بعدين نروح المنصة نبصم في الكشف اللي مع العسكري اللي هناك


أول خطوة كانت سهلة و لطيفة قوي و أخدت ورقة بتقول "لم يصبه الدور وغير مطلوب للتجنيد نهائيا" واللي إكتشفت إنها طالعة من قبل العيد (يعني من أكتر من إسبوعين فاتوا) ...
تاني خطوة بقة كانت هية القشة اللي قصمت ظهر البعير ... المفروض كل الناس دي تبصم في كشف واحد عند عسكري واحد سليط اللسان واقف بيسب بالدين للناس وللي علمهم إلخ إلخ - صباح عقد النقص عيني عينك كده
الكوميدي إنه بيبصم الناس على أي إسم عشوائي فالكشف - المهم أنه الكشف يكون كله بصمات ! وكمان بياخد الإستمارات الفاضيه من الناس تاني و يحطها جنبه هيه وأي دليل يثبت إننا دفعنا قرش للوابش دول (ممكن قوي يبيعوا نفس الورق بكرة للفوج اللي بعدينا)

حظه بقه إني كنت في أول الناس اللي قدامه و هوه بيلقي وصلة جديدة من الشتيمه (سب الدين) ... فما كان مني إلا إني طبقت الورقة اللي أنا محتاجها منهم و حطيتها في جيبي و أخدت أخينا ده شطفته و زعيق بزعيق بقه بس من غير شتيمة ...
هوووب جه صول عالزعيق و عمال يشخط و يقول فيه إيه و بتاع ... قمت واخده ورصيتهمله و أنتوا سبب الهرجله دي ... إنتوا اللي بتبوظوا أي نظام ... محدش فيكم عنده عقل يفكر و فالحين في قلة الأدب و إنتوا ماتسووش حاجة أصلا - إنتوا نصابين ... هوه فيه حد بيبصم جنب إسمه أصلا ...
فضييت كل الشحنة اللي عندي من الصبح و قمت واقف في وسط الزحمة و قلت للناس دول حرامية و نصابين و لوحد فيكم فلوسه حلال يقطع الورق ده عشان ميبعهوش لحد تاني و قمت كخشششششت مقطع الورق و رميه على الأرض و مشيت من غير ما أبصم فالكشف :)

واضح إنهم خافوا لما لقوني بزعق لأكون واصل (أصلي كنت ببخ فالكل عيني عينك كده وبفلقطلهوم فمنطقتهم) - فا محدش كلمني و كام واحد حواليه قاموا مقطعين الورق همه كمان و رموه للعسكري و مشيوا ...


وزارة الدفاع المصرية ...
تييييييييييييييييييييييييييييت

٢‏/١‏/٢٠٠٧

كل سنة وانتي طيبة يا مصر

٢٧‏/١٢‏/٢٠٠٦

مبروك عليكي عريسك الخفة ... يا عروسة - الجزء الثاني

أول ما انتقلت للعمل هنا في القاهرة من خمستاشر شهر تقريبا كنت بسافر بالسوبرجيت - لإنه أياميها كان رمضان و لأني بحب أفطر في إسكندرية يوم الخميس فا كنت بركب السوبرجيت حيث أن مستحيل ألحق التوربيني (ولا موأخذة) بتاع الساعة إتنين عشان مواعيد الشغل ...

المهم بعد ما خلص رمضان فضلت مقضيها سوبرجيت و غرب الدلتا لحد ما خنقوني قوي بسبب الأوتوبيسات البايظة و المواعيد الخربانة و المضيفات ال*** - ما علينا ...


أياميها بدأت أركب القطار و ظبت مواعيدي مع أسباني الساعة ستة اللي كان أياميها (هييييييه - كانت أيام) بيوصل في ميعاده حوالي تمانية و تلت ...

فضلت بركب القطر أفندي مستحمل التكييف اللي على طول بايظ في الصيف و العراك مع المفتش كل إسبوع عشان يصلحوا التكييف (أم التكييف في روايات أخرى موثقة)

هوب إبتده موضوع القطارات اللي بتخش فبعض و الجرارات اللي بتتحرق و العربيات اللي بتخبطها القطارات في المزلقانات وسبحان الله في يوم وليلة مبقاش في قطارات بتيجي في ميعادها ولا بتوصل في ميعادها مع إنهم لسة لحد دلوقتي بيتحرقوا و بيخبطوا في بعض (جرار أسباني الساعة ستة إتحرق من يجي شهر كدة وكنت من الناس اللي راكبين يوميها و اخدنا السكة في خمس ساعات بدل ساعتين !)


هنا ظهر حل عبقري جديد - ماهو المصريين ميغلبوش أبدا ... الميكرباصات التويوتا الأربعتاشر راكب بتاعة زمان اللي تدشدش ركب أي حد طويل زي حالاتي نزل منها فيرجن جديد خماستاشر راكب بس واسعة و مريحة و بالتكييف و كمان فيها دي في دي بلاير يعنى كمان حنشوف أفلام ... أنا مكدبتش خبر بعد ما ناس كتير نصحوني بيها و إبتديت آخد عليها على الرغم من مشاكلها المتمثلة في عدم وجود مواعيد ولا مواقف رسمية و طبعا السي دي الشهير اللي لازم السواق يشغلة إستفتاحة بعد سورة يوسف عدل بتاع دينا و البنات بتوع الإل بي سي وشوية رقاصات درجة عاشرة على صوت الفنان المتألق دائما زينة شباب شبرا - سعد أفندي الصغير !!

وعلى الرغم من إن سواق الميكروباص مرة عدى إشترى حشيش فالسكة وهو رايح القاهرة من حتة بعد العامرية بشوية (الله يكرمه خدنا معاه ووقفنا ننتظر الأخ الفاضل اللي كان بيجيبله الحشيش) بس أنا كنت مقرر الصمود للنهاية
...

لحد هنا خلص الكلام ...

إيه بقى اللي حصل بعد ما المحافظ الجديد تولى سدة الحكم في إسكندرية ...

الراجل ده قرر إنه يدعم السكة الحديد اللي فقدت أغلب روادها بسبب الحالة اللي وصلتلها بإنه يقضي على أي مواصلات بديلة تنقل الكام ألف بني آدم اللي بينتقلوا يوميا مابين القاهرة و إسكندرية ...

في يوم سبت نازل الصبح و واخد شنطتي على كتفي ورايح محطة مصر آخد ميكروباص من دول ملاقتش ولا واحد - ولقيت ناس كتييييييييير قوي واقفين - فيهم اللي واقف من أكتر من ساعة مستني الفرج ... أتاريهم موقفين ظابط مرور مخصوص عشان "يعكش" الميكروباصات دي !


أنا طبعا شوفت الحالة كدة قمت ناطط في تاكسي و سيدي جابر يا أسطى ... سبحان اللي خلاني أعمل تليفون لواحد صاحبي أساله ركب ولا لسة - قالي إنه ركب من الموقف و قالي متروحشي سيدي جابر - موقفين هناك ظابط برضه عشان "يعكش" الميكروباصات و مافيش ولا ميكروباص هناك

أنا قولت لصاحبي خلاص - أركب سوبرجيت وأمري لله

قالي لاااااء لهو انت ما تعرفش ... مش المحافظ نقل السوبرجيت و غرب الدلتا من سيدي جابر للموقف الجديد !!

أفندم !!!!!

يعني عشان أروح القاهرة يا أركب القطار و يعالم حيوصل إمتى - ده إن ماعملهاش و إتقلب ولا إتحرق أو أروح زي الشاطر الموقف الجديد عشان أركب سوبرجيت ولا غرب الدلتا ولا ميكروباص ولا بيجو حتى !!


طيب نراجع بقى المحافظ عمل إيه بالحركات الجريئة بتاعته دي :

1 - نقل محطة الأوتوبيسات الرئيسية بره المدينة ودي حاجة مسمعتش بيها في أي حتة في العالم - طول عمر محطة الأوتوبيسات بتبقى في نص المدينة !! - يا عم كانوا شالو السوبرجيت من ميدان الجيزة ولا من التحرير !! (جدير بالذكر إنه المحافظ السابق لما حب يعيد توزيع مواقف المواصلات العامة في إسكندرية نقل السوبرجيت من محطة الرمل لسيدي جابر مش للموقف الجديد مع إنه كان هوه اللي باني الموقف الجديد - يا سبحان الله )

2 - تسبب في خساير مهولة لشركات الأوتوبيسات - ميين ياخد تاكسي بعشرة جنيه من سيدي جابر للموقف الجديد عشان يرجع ياخد أوتوبيس بخمسة وعشرين جنيه ! - القطار أوفر و قعدته أريح حتى في وجود الريسك فاكتور و التأخير المضمون إنشاء الله ... وبعدين صحيح - على مين تكلفة المحطات الجديدة اللي بنوها الناس ده ومبقالهاش عشر سنين والمحافظ بيهدها لهم دلوقتي!

3 - قطع رزق الولاد سواقين الميكروباصات اللي بقوا خارجين عن القانون في يوم وليلة ومالهمش حتة يحملوا منها ركاب (مشفتهمش في الموقف الجديد لما رحت هناك)

4 - عمل رواج لسواقين التاكسي الجشعين اللي لن يتورعوا عن طلب أرقام فلكية من الركاب اللي شاءت الأقدار إنها ترميهم في الصحراء (الموقف الجديد) تحت رحمتهم ... آخر مرة بقول لسواق التاكسي محرم بك - بصلي من فوق لتحت و قالي حناخد عشرين جيني إنشاءالله - ويعلم الله إني كنت مستعجل عشان كده إكتفيت بإني أقوله "رووح الله يرضى عليك" - علما برضه بإني كنت حويط وشاورت لتاكسي بينزل ركاب لسة على باب الموقف عشان ميقوليش إنه بايت هنا من إمبارح مستني زباين !

5 - فضى حتة مكانش فيها أي مشاكل مرورية خطيرة يعني والله أعلم حيعمل فيها إيه - إسكندرية مش ناقصة نوافير والنبي ياأبا الحاج !!

---------------------------------------------


أنا بقى حعمل ديمو لواحد مسافر من القاهرة لإسكندرية يوم خميس (الكلام ده حصل معايا فعلا الخميس اللي فات)

1 - حجز في توربيني الساعة 2 ظهرا من قبلها بثلاث أيام عشان أضمن مكان = 25 جنيه (وجنيه معونة شتاء و عشرة صاغ مكافحة درن بيلموها من سنة 56 ولسة مصر فيها درن !)
2 - تاكسي من مدينة نصر لرمسيس 1:15 ظهرا عشان يادوبك ألحق = 10 جنيه
3 - وصول رمسيس 2:05 ظهرا - التوربيني إتحرك = تاكسي للتحرير = 5 جنيه
4 - غرب الدلتا لإسكندرية (الأوتوبيس بتاع 2:30 اللي مش بيعدي عالجيزة) = 22 جنيه
5 - إكرامية للعامل اللي حط الشنطة في بطن الأوتوبيس (بلطجة) = 1 جنيه
6 - الأوتوبيس يعطل في السكة وننتظر أوتوبيس يجي ينقذنا يا عالم إمتى = آذان المغرب يأذن و أنا صايم = بيبسي و باكو بسكوت لامبادا أبو نص جنية من عند مضيفة الأوتوبيس = الحساب 10 جنيه (راجع بوست السوبرجيت )
7 - وصول الموقف الجديد متأخر وإكرامية للعامل اللي جاب الشنطة من بطن الأوتوبيس (بلطجة) = 1 جنيه
8 - تاكسي لمحرم بك (الموقف الجديد بيقولوا عليه إنه في محرم بك برضه) = 5 جنيه (بالفصال)

إجمالي: 80 جنيه مصري فقط لا غير + خمس ساعات في الطريق !

يبقى لازم نرجع ونقول ...



مبروك عليكي عريسك الخفة ... يا إسكندرية !!!!!