١٨‏/١١‏/٢٠٠٨

مدينتي: كلاكيت تاني مرة !


كتبت هنا من أكثر من عامين عن مشروع "مدينتي" وعن أسعاره الفلكية و الصدمة التى تلقيتها يوم زرت مقر مبيعاتهم في الإسكندرية ...
دارت الأيام ومرت الأيام على رأى الست أم كلثوم وإحتكيت بحكم طبيعة عملى ببعض مشاريع شركة طلعت مصطفى القائمة بالفعل زي مدينة الرحاب وللأمانة بدأ تفكيري يتغير تدريجيا ...

آه أنا مازلت مؤمن إن أسعارهم عالية لكن مش عالية "قوى" زي ما كنت فاكر قبل كدة ... المجتمعات دي بتوفر لقاطنيها "نمط حياه" مختلف عن اللى تعودنا عليه في مصر - وبكلمة نمط حياه أنا أقصد مساحات خضراء وحدائق بيتم الإعتناء بها جيدا ... شوارع واسعة وأماكن إنتظار ومبيت للسيارات بنسب تتوافق مع عدد الوحدات والكثافة السكانية ... أسواق تجارية منظمة ... خدمات أمن ونظافة بجد ... جوامع تستحق أن يطلق عليها كلمة جوامع ... شبكة مواصلات خاصة داخلية وخارجية ... مدارس و مستشفيات ونادي ومولات وملاهي - من الآخر، كل ما تحتاجه أسرة مصرية لتعيش حياه "آدمية" ...

الحاجات دي كلها أكيد بتتكلف فلوس و بيتم تحميلها على سعر الوحدات - ده غير طريقة السداد طويلة الأمد اللى بتزيد عن 10 سنوات لو عايز مما يعني فوائد مركبة و بالتالى زيادة في الأسعار ... حد كان حسبها قبل كدة في أحد المنتديات عشان يطلع سعر المتر كاش يبقى كام لو إفترض الفائدة السنوية ووجده سعر منطقي جدا بالمقارنة بسعر السوق (ده رأيه مش رأيي لأني مازات مؤمن إن الأسعار أعلى شوية من المنطقي)

كل دي كانت مقدمة للموضوع الأصلى ... موضوع عقد أرض مدينتي و طريقة السداد ...

اليوم السابع كانت نشرت نص وبنود عقد مشاركة / تخصيص بين شركة طلعت مصطفى وهيئة المجتمعات العمرانية الجديدة - عقد الأراضى المقام عليها مشروع مدينتي ...

النقطة اللي هاجمتها الجريدة هي قيمة الأرض و طريقة سداد هذه القيمة للدولة إذ أن المتفق عليه في التعاقد هو إن السداد حيكون عبارة عن وحدات سكنية كاملة التشطيب بنفس مستوى تشطيب مدينة الرحاب (تسليم مفتاح - سوبر لوكس يعني) على أن تكون مساحة هذه الوحدات 7% من إجمالى مساحة الوحدات السكنية بالمشروع .

نحسبها بالمنطق وبعدين بالورقة و القلم ...

بالمنطق لو طبقنا نفس النموذج بتاع بيع أراضي دريم لاند لأحمد بهجت حنلاقي الدولة شايفة نفسها "مظلومة" لإن الأرض قيمتها زادت جدا عن ما باعوها - و أحمد بهجت شايف إنه ده حقه لإنه خاطر بمشروع كان ممكن جدا يفشل وساعتها محدش كان حيقف جنبه وبعدين بسبب المشروع بتاعه و نجاحة الدولة باعت الأراضي المتاخمة و القريبة بأضعاف السعر اللي باعت له بيه ...

يبقى الحصول على مقابل عيني عبارة عن نسبة من المشروع هو حل جيد ... لو المشروع نجح قيمة النسبة حتزيد ... لو المشروع فشل أهو الدولة حتسترد الأرض و يادار مادخلك شر.

نيجي للورقة و القلم ... سعر الوحدات في مدينتي تضاعف من ساعة الإعلان عن المشروع وحتى الآن ... يعني سعر المتر بدون تشطيب حسب ما كتبت أول مرة كان 3540 جنيه وده بتاريخ 6 أغسطس 2006 - دلوقتي سعر المتر بدون تشطيب 6330 جنيه (علما بأن الأسعار مستقرة بقالها مدة عشان قضية هشام طلعت ثم شهر رمضان يعنى الكساد الموسمى في سوق العقارات ثم إنخفاض أسعار مواد البناء ثم الأزمة الإقتصادية العالمية وموضوع التمويل العقارى) - يعني لو حد قارن أول سعر إبتدوا بيه بالأسعار الآن حيلاقيه زاد الضعف تقريبا في سنتين ونصف ...

طيب - سعر متر الأرض كدة يبقى واقف بكام؟
المشروع ده فيه 80 ألف وحدة سكنية ... لو متوسط مساحة الوحدة على أقل تقدير 100 متر مربع - يعني 8 مليون متر مربع
سعر المتر الأن بدون تشطيب 6330 ... قول لو متشطب وكمان سنة على الأقل (عند الإستلام) السعر حيبقى بالميت وعشان كاش 6000 جنيه
يبقى سعر الأرض اللي حتصل عليه الدولة لو باعت الوحدات دي في المزاد العلنى هو 7% × 8 مليون متر مربع × 6000 جنيه = 3 مليار و 360 مليون جنيه
طيب الأرض دي كام متر ... الأرض دي 8 ألاف فدان ... يعني الفدان ب 420 ألف جنيه ... يعني المتر بسعر الوضع الحالى ب 100 جنيه !
أرض في الصحراء في آخر نقطة معمورة في القاهرة الجديدة بالحجم ده تتباع ككل بالسعر ده و الدولة غير مسئولة عن شبكة الطرق بداخلها ولا المرافق و الخدمات بداخلها ... السعر عادل جدا .

يبقى ومع كامل الإحترام لجريدة اليوم السابع و للنائب طلعت السادات - "قيمة" بيع الأرض المرة دى كويسة ... وياريت يعملوا كده كل مرة !




9 Comments:

Blogger Ola said...

أولا أن لسة فاكرة البوست القديم بتاعك ده من كام يوم بس!! و قلت برده و دارت الأيام:)
ُثانيا، مظبوط كلام سعتك يا در رأفت:) الحكومة بتستهبل كالعادة و ده طبعا علشان القضية بتاعة البيه!! في حين أنه لو كانت الأمور مستقرة معه لما تم فتح الموضوع من أساسه!! تماما مثل أرض الجونة التي تم بيعها بسعر دولار للمتر!!

١٩/١١/٠٨ ٢:٢٤ ص  
Blogger Rosa said...

مش هتكلم في السعر غالي و لا لأ لانه أكيد غالي بس هم بيبيعوا بسعر بكرة لما يسلموا الوحدات كمان هم زي ما انت قلت بيبعوا خدمات إضافية كتيييييييييييير

أنا زرت مدينة الرحاب أكتر من مرة و انبهرت بتخطيط المدينة و جمال المساحات الخضراء و حسن تنسيقها و كل الخدمات المتوفرةحاجة تحفة بجد.و حقيقي تستحق فلوسها بس برضه مش قوي كدا :)

١٩/١١/٠٨ ٣:٤٩ م  
Blogger رئـــــيسـة حزب الأحلام said...

مدينتى هو بجد زى مابيعلنوا بيعملوا اماكن حضارية
انا ماشفتش حاجة
بس ياريت يعملوا اماكن للشباب مع الاهتمام بانها ماتكونش عشوائية
تحياتى

٢١/١١/٠٨ ٢:٥١ م  
Blogger اقصوصه said...

هاي شكلها مش مدينتي

هاي شكلها مدينة الاحلام!

٢٣/١١/٠٨ ١١:٢٩ ص  
Blogger Empress appy said...

بص هى المدينه كفكرة هى او الرحاب من قديم الازل وهم بجد
وانا بحبها جدا بس قضيه هشام راى فيها انه خروف ضحيه يعنى ولسه هتبان
موضوع الحكومه ما طول عمرها واكله مستعبطه ومستهبله

٢٣/١١/٠٨ ١١:٥٤ ص  
Blogger محمود محمد حسن said...

يا خسارة يا جدو اسكندر

دفعولك كام علشان تغير كلامك

:))

ههههه

بهزر

كل سنة وانت طيب

١٢/١٢/٠٨ ٧:٣٣ م  
Blogger بـِصَمتـِـ أميرة ــــى said...

مدينتى على فكرة مشروع وهم
انا اعرف مهندسين مصريين اشتركو فى تنفيذه
هو غالى حبتين
واوفر 3 حبات بس صدقنى بعد كام سنة
هتبقى الاسعار دى عادية
واللى اقامو المشروع ده بصو للكام سنة دول عهلى اساس انهم وقت ماهيسلمو الوحدات دى هيكون وقتها السعر بقى طبيعى ومتداول بين المشروعات السكنيه الاستثمارية الجديدة

تقبل مرورى
وتحياتى
ملكة بحجابى

٥/٤/٠٩ ٨:٤٥ م  
Blogger www.tadwina.com said...

مرحباً <>،
لقد قام أحد المعجبين بمدونتك بإضافتها إلى تدوينة دوت كوم، بيت المدونات العربية.

قام فريق المحررين بمراجعة مدونتك و تصنيفها و تحرير بياناتها، حتى يتمكن زوار الموقع و محركات البحث من إيجادها و متابعتها.
يمكنك متابعة مدونتك على الرابط التالى:
http://www.tadwina.com/feed/948

يمكنك متابعة باقى مدونات تدوينة دوت كوم على الرابط التالى:
http://www.tadwina.com

لعمل أى تغييرات فى بيانات مدونتك أو لإقتراح مدونات أخرى لا تتردد فى الإتصال بنا من خلال الموقع.

و لكم جزيل الشكر،

فريق عمل تدوينة دوت كوم.
http://www.tadwina.com

٢٥/٥/٠٩ ٩:٤٢ ص  
Blogger Here i'm said...

انا كمان شغال فى مجال المقاولات فى الأسكندرية ..المشكلة ان اى حد بيتكلم و خلاص .. بالنسبالى مشروع زى مدينتى ناجح جدا للحكومة .. غير المكاسب اللى حسبتها .. عمرت المسافة اللى بين القاهرة و مدينتى سوء كانت خاصة او ملك الدولة .. رفعت سعر أراضيها ما قبل مدينتى و ما بعدها .. كسبت مدينة عالمية .. و ممكن و دا اللى بقترحه بدل ما يتم بيع الوحدات المخصصة للحكومة بالمزاد .. يتم نقل بعض الوزارت هناك أو فتح مكاتب أستثنائية للوزرات هناك لخدمة سكن مدينتى ..


لو متابع حركة الأراضى و المنتجعات الجديدة .. لو حد عايز يتكلم بجد يشوف مشروع زى ألكس ويست فى أسكندرية تكلفة الأرض كام و بكام سعر المتر ..

تحياتى

٢٥/١٠/٠٩ ٢:٢٢ ص  

إرسال تعليق

<< Home