12‏/9‏/2006

تري تو بي فيير يا ليلى



طبعا أنا كنت في البيات الإسبوعي بتاعي في إسكندرية ولسة راجع إمبارح ... وكان يوم طوييييل كله بره البيت و المكتب - بعيدا عن أي كمبيوترات
بالليل لما روحت هلكان قولت أتعشى و أشوف ميين كتب إيه اليويمن اللي فاتو دول فا شوفت حملة "كلنا ليلى" و ردور الأفعال على كل البلوجز

أينعم أنا بكتب بعد الهنا بسنة (لسة فاكر) - بس أصل فيه شوية كلام واقف في زوري ولازم أطلعه
ليلى ... إسم جميل لما تأملت فيه لقيت بنت مصريه في أواخر العشرينات تميل للسمره قليلا - نحيفة - فرعونية الملامح وعلى قدر متوسط من الجمال ... ده اللي أنا
شايفه في خيالي دلوقتي لما سمعت الإسم ده ...
في ضوء الحملة شوفت ليلى مذعورة بتجري بين كائنات ضخمة مغطاه بالشعر - كائنات ذات كروش مدلاه - صوتهم عالي - نظراتهم حاده !!
كائنات تطيح بها في لحظة - تتحرش بها نفسيا و جسديا - كائنات تسبب لها إحساس متنامي بالقهر ... قهر عنصري لمجرد أنها "ليلى"

أنا معاكي يا ليلى لحد ما ... بس ممكن أطلب منك طلب - إعملي زووم أوت - حاولي تخرجي من جسد ليلى الضعيف و تطيري عشان تشوفي من بعيد مشاهد كاملة ... مشاهد فيها ليلى برضه - ليلى و حسين ...

******************************************************

المشهد الأول:

منزل لأسرة متوسطة في أوائل الثمانينات - إضاءة الشمس المائلة لمغيب تتخلل فراغ غرفة الأطفال الصغار

حسين: ويوا - ويوا - ويوا (دافعا أمامه لعبته الجديدة - سيارة شرطة صينية الصنع)
ليلى: (تضحك ببراءة بينما تعبث بعروستها الجديدة)

وفجأة تصدم السيارة بقوة بالدولاب لتتحطم بصوت مسموع

حسين: (ينظر بإحباط للعبته الجديدة ثم ينفجر بالبكاء)
الأم: (تجري مسرعة لغرفة الصغار لتفهم بنظرة خاطفة ما حدث)
حسين: ماامااااااااا (باكيا)
الأم: شوفت بقى الشقاوة ...
الأم: بطل عياط - مفيش رجالة بتعيط
حسين: (يتمالك نفسه قليلا وعلى وجهه نفس النظره الحزينة)

- قطع -

منزل لأسرة متوسطة في أوائل الثمانينات - إضاءة الشمس المائلة لمغيب تتخلل فراغ غرفة الأطفال الصغار

حسين: ويوا - ويوا - ويوا (دافعا أمامه لعبته الجديدة - سيارة شرطة صينية الصنع)
ليلى: (تضحك ببراءة بينما تعبث بعروستها الجديدة)

وفجأة تنكسر يد العروسة (صينية الصنع برضه)

ليلى: (تنظر بإحباط للعبتها الجديدة ثم تنفجر بالبكاء)
الأم: (تجري مسرعة لغرفة الصغار لتفهم بنظرة خاطفة ما حدث)
ليلى: ماامااااااااا (باكية)
الأم: تعالي يا حبيبتي ...
الأم: (محتضنة ليلى) معلهش يا حبيبتي - بكرة ننزل نجيب واحدة تانيه جديدة
ليلى: (تلمع عيناها و تنفرج شفتاها عن إبتسامة بريئة)

******************************************************

المشهد الثاني:

شتاء سكندري في أواخر التسعينات - محطة ترام كامب شيزار - صوت الترام المزعج المحبب لكل السكندرين يخترق سكون الشتاء

ليلى: (تقفز في العربة الأولى أو الأخيرة من الترام - مش فارقة)
ليلى: (تنظر مليا نحو حسين الذي يلعب دور شاب في مقتبل عمره)
حسين: (يهب واقفا) إتفضلي يا آنسة
ليلى: ميرسي

- قطع -

شتاء سكندري في أواخر التسعينات - محطة ترام كامب شيزار - صوت الترام المزعج المحبب لكل السكندرين يخترق سكون الشتاء
حسين: (يقفز في العربة الوسطى للترام - دون أن يقصد)
ليلى: (تنظر مستنكرة لحسين)
إعتدال: (تصرخ) راجل!!
الكمسري: إمشي يا واد من هنا - دي عربية الحريم
حسين: (مرتبكا) آسف والله - مخدتش بالي ... أنا لما شفتك إفتكرتها عربية رجالة !

******************************************************

المشهد الثالث:

كلية الهندسة - فصل دراسي لطلبة قسم عمارة - محاضرة دمها تقيل لدكتورة دمها أتقل - الساعة 8:50 صباحا

الدكتورة:إنتوا الإتنين - إطلعوا بره
عوض: أنا ... ليه يا دكتورة
الدكتورة: بتتكلم انت واللي جانبك
حسين: (يطرق الباب مترددا)
الدكتورة: ساعتك كام يا بشمهندس؟
حسين: والله ظروف غصبن عني ... المواصلات يا دكتور - أنا متأخر خمس دقايق بس
الدكتورة: ممنوع حد يتأخر دقيقة واحدة - ما كل زمايلك جم أهه
الدكتورة: إتفضل - عشان تتعلم إنه مفيش حاجة إسمها ظروف

- قطع -

كلية الهندسة - فصل دراسي لطلبة قسم عمارة - محاضرة دمها تقيل لدكتورة دمها أتقل - الساعة 8:50 صباحا

الدكتورة: إنتوا الإتنين - إطلعوا بره
إعتدال:(مذهولة) ... ليه يا دكتورة
الدكتورة: بتتكلمي انتي واللي جانبك
ليلى: (تطرق الباب متردده)
الدكتورة: ساعتك كام يا بشمهندسة؟
ليلى: أنا أسفة والله يا دكتور ... ممكن ثانية واحدة بس
الدكتورة: إتفضلي
ليلى: (تقترب من الدكتورة هامسة في أذنها بعدة كلمات مقتضبة)
الدكتورة: (متصنعة الحزم) متتأخريش تاني بعد كدة - إنت فاهمة ... إتفضلي على جوه !!

******************************************************

المشهد الرابع:

كليه الهندسة - صيف 2001 - مناقشة مشاريع طلبة سنة تانية

دكتور 1: (بقرف) إييه ده !
حسين: (مرتبكا) ده مشروع كافيتريا على الطريق السريع بين القاهرة و إسكندرية
دكتور 2: (بنفس القرف) ومالها عامل كده ليه !
دكتور 1: (متهكما) دي تنفع في الطريق الزراعي في طنطا مش الطريق السريع !
دكتور 2: (متهكما) تصدق آه - حتى محلات الحلاوة أهيه (مشيرا لمنطقة البازارات الملحقة)

- قطع -

كليه الهندسة - صيف 2003 - مناقشة مشاريع طلبة البكالريوس

دكتور 1: ماشاء الله - إيه الحلاوة دي (متفحصا فستان ليلى الأحمر القصير المفتوح حتى منتصف فخدها)
دكتور 2: فعلا حاجة جميله قوى (شرحه !!)
ليلى: ده مشروع سجن خمس نجوم للمجرمين اللي ظروفهم تسمح يعني - أنا عاملاه على كوكب المريخ عشان السيكيوريتي إشيوز طبعا
دكتور 1: فكرة جميلة جدا
دكتور 2: البنت دي شاطرة فعلا !!

******************************************************

المشهد الخامس:

عمارة تحت الإنشاء - منتصف الظهر - الدور الثالث عشر

مقاول: فين البراويطة يا *** يابن ال**** (ممسكا بتلابيب عامل شديد السمرة)
العامل: والله يا معلم ...
المقاول: (مقاطعا) وبتحلف بربنا يابن *** ال***
حسين: (بلهجة قاسية) أيه اللي بيحصل هنا ده (واضعا خوذته البيضاء فوق رأسه)
المقاول: واد ابن *** حرامي
حسين: طب سيبه خلاص - انت عدمته العافية

- قطع -

عمارة تحت الإنشاء - منتصف الظهر - الدور الثالث عشر

مقاول: فين البراويطة يا *** يابن ال**** (ممسكا بتلابيب عامل شديد السمرة)
العامل: والله يا معلم ...
المقاول: (مقاطعا) وبتحلف بربنا يابن *** ال***
ليلى: (بلهجة مترددة) في أيه يا معلم (واضعة خوذتها البيضاء فوق حجاب رأسها)
المقاول: واد ابن *** حرامي
ليلى: (بنبرة خجلة مترددة) ماشي !!

-----------------

ممم - بي فيير يا ليلى
!!

20 Comments:

Blogger Epitaph said...

Try to be fair ya 3am el judge!!

the problem is that streotypical picture of "women" as body and beauty! Nevertheless...not all men persume them so..and not all women exploit this! if you know what I mean!

On the other hand, not all men are that gentle..and open minded...and show readniness to listen and understand the other partner- woman- and rid himself of that inherent masculine authority..and try to be more flexible and comprehend the woman's psychology

as I said before...el mawdoo3 kebeer kebeer kebeer :D

by the way...your style of writing is really great..vividly visualising those scenes,,you're talented, masha Allah, that's for sure!!

:)

P.S.Rabna tab 3alina mn el word verification :D ...!! A7mehed ya Rab...mosh 7aktebha sab3 tamn marat ya3ni :D

12/9/06 4:11 م  
Blogger BaTaBeeT said...

tesada2 se3ebt 3lia !!

anyway 3aiz te3aiat momken te3aiat ma7adesh 7ay2olak 7aga
bas ana momken a3ml 7agat melly bte3melha mn 3'er ma 7ad ye2olee 7aga ?!!!

anyway.... nice post :)

13/9/06 2:51 م  
Blogger Geddo Iskandar said...

esta3ana 3al sha2al bellah :D

epitaph:

i totally agree with u - ana 7abet bas 2a2ol eno el regala kman maqhoren fel mogtama3 - mosh melok motawaga 3al 2ard ...

bas al7amdolelah rabena 3adel w lazem kol wa7ed ykon mabsot bema 7`oleq laho

i just hate enena n2aked 3ala e7sas el qahr 3and el setat - ana fe ra2yey eno goz2 kber men da bykon bsabab mo7awlet 2a7ad el gnsien kasb morab3at hwa 3`ier mo2ahal nafsyan aw gasadyan le el w2of 3alyha :D
.
.
.
w ba3den law tawelty fe mawdo3 kolona layla da 7arga3 el word verification - 2eshtery nafsek,huh

:D


batabeet:

awalan toshkar ya zo2 :D

thanyan ... dont take it personal ;)

14/9/06 1:23 ص  
Blogger sarah la tulipe rose said...

ليه كدة بقييييي
احنا برضة اللي تبلأه فير؟!اولا الاستاذ حسين انقرض اساس دلوقت البنت تقف في كل حته في المواصلات و الكلية و الولاد يعملوا نعامة حسين ده كائن فضائي
و برضه فيه ليلات غلابة بجد مش زي اللي كاتب عنهم حرااااااااااام

14/9/06 10:10 م  
Blogger Gbalawy said...

جدو ياجدو
بوست لزيز
بس عايز اقولك حاجه موضوع كلنا ليلى ده موضوع جميل بيفكرنى بالحكومه بتاعتنا قول اللى انت عايزه وانا اعمل اللى انا عايزه
فاسبهم يتكلموا ياعم
دا الكلام الحاجه الوحيده اللى ببلاش



تحياتى

15/9/06 6:46 م  
Blogger Gid-Do - جدو said...

المفكر الشاب جدو اسكندر

كل سنة وانت طيب بمناسبة شهر رمضان وان شاء الله رمضان الجاى تتحل كل مشاكل مصر ودة مش بعيد على الله

16/9/06 5:44 ص  
Blogger دعاء غريب said...

جدو اسكندر
انا اوافقك الرأي يافندم
اللي انت حكيته ده بجد بيحصل
وعلي يدي
يمكن ليلات الاخريات يزعلوا مني علشان كلامي ده خاصه واني ليلي مثلهم
لكن أنا شايفه اني أغلبيه اليلايات أخدوا حقوقهم كامله
انا نفسي كنت المدلله في البيت لمجرد اني ليلي
وداخل الكلية ايضا كنت أحظي علي تقدير الدكاترة وطوله بالهم في المناقشة لمجرد اني ليلي
لكن في المواصلات العامة بقف في الاتوبيس زنهار لمجرد اني ليلي ايضا
:(

16/9/06 12:45 م  
Blogger sahar said...

تخيل حسين ده غلبان بشكل صعب عليا والله وبعدين ماحدش يقدر ينكر ان فيه بنات واخدة حقها تالت ومتلت بس بوست جميل والله واسلوب محترم ورائع في عرض وجهة نظر الطرف الآخر
مع تحيات الست أم أحمد
---------------------

16/9/06 5:11 م  
Blogger أُكتب بالرصاص said...

بصراحة
اهنيك



واشد على ايديك

18/9/06 1:21 م  
Blogger shabaskandrany said...

ازاى تيجى اسكندريه من غي ما تسلم عليك واحدة
بوست جميل

18/9/06 7:36 م  
Blogger Geddo Iskandar said...

sarah la tulipe rose:
مش كل البنات ليلى و مش كل الولاد حسين - أنا بس حبيت أعمل "فووكس" عل الآخر

بس لسة فيه حسين زي اللي أنا كاتب عنه ده - وكتيير كمان عشان تبقي عارفة

الخميس اللي فات واحد قاطع تذكرة أصر يقوم لواحدة مش قاطعة تذكرة (في القطار) عشان مينفعش تقف طول السكة - فعلا إنسان محترم


gabalawy:
أهو - أدينا برضه بنحاول يا باشا - عشان محدش يقول طنشنا و صدرنالهم الطرشه
:D


جدو العزيز:
وانت طيب يا جدو يا جميل - و السنة اللي جاية تكون بتفطر معانا انت و ياسمين إنشاءالله
:)


دعاء غريب:
معجب قوي بحياديتك - بس تو بي فيير قوي ... ليلات المدينة واخدين حقوقهم أكتر من ليلات الريف - أو هكذا يقولون
المفروض يحددوا أنهي ليلات بدل مالموضوع كبر كده مرة واحدة
.
.
.
منورة
:)


sahar:
بحب قووووووي إسم أم أحمد ده - و ميرسي جدا عالتشجيع


أكتب بالرصاص:
الباشا الكبير قوي ... طالما بصراحة يبقى أشكرك شكرا جزيلا - انت سيد العارفين ... الصراحة راحة يا سيدي
:D


shabaskandrany:
مفهمتش قصدك أيه
:D
بس منور والله

18/9/06 10:22 م  
Anonymous غير معرف said...

كل سنه وانتم طيبين وربنا يعود علينا وعليكم الايام بخير

20/9/06 1:09 م  
Blogger shabaskandrany said...

فين بوستاتك الجديدة ياجدوا

25/9/06 10:46 م  
Blogger محمود ماجد said...

كلنا حسين

:D

27/9/06 9:00 ص  
Blogger محمود ماجد said...

انت فين يا جدو ؟؟؟

اختفيت ليه

3/10/06 7:53 م  
Blogger Epitaph said...

fein fein....

mosh 3aref

ana tayha wala eh..

salam alikom

:D

5/10/06 3:22 م  
Blogger nada said...

لا بوست حلو بصراحه معلش متاخره
بس يا ريت كان الوضع كله كده مكانتش الواحده غلبت
تحياتي

7/10/06 5:27 م  
Anonymous غير معرف said...

انت فين ياجميل
ايه الغيبه الطويله دىىىىىىىى

8/10/06 10:15 م  
Anonymous محمد حبيب said...

:) واحشني يابوحميد
واحشني اوي بجد

9/10/06 4:06 ص  
Blogger Pink Unicorn said...

جدو اسكندر العزيز :

بوست هايل ..
واسلوب رائع ..

و.. حاضر
I will try to be fair
:)))

النماذج دى كلها موجودة
و بالتأكيد فيه سيدات متحيزات لليلى على حساب حسين .. عنصرية مضادة بقى

وده طبعاً غلط .. و ما اقدرش اختلف معاك فى ده

بس حكاية العمارة تحت الأنشاء دى
انا حاسة ليلى مكسوفة بس
او مش عارفة تتعامل مع نوعية العمال
مش عشان مفترية يعنى
:))))

وكمان الأتنين الدكاترة بتوع المشروع دول

ده هنا حسين بيظلم حسين يا جدو
انت بى فير بقى

:))))

فى النهاية
انا معاك اكيد
فيه نماذج كتير لحسين فى المجتمع
و فيه كمان نماذج كتير سلبية لليلى

وانا و كل ليلى
اكيد نتمنى يكون كل الرجال حسين
هو حد يكره؟

:))))

22/10/08 3:26 م  

إرسال تعليق

Links to this post:

إنشاء رابط

<< Home