الدستور ... موضوع كنت شايله فالدرج !

الموضوع ده و مواضيع تانيه بقالهم مدة فبالي و عاوز أتكلم - بس كنت مأجل الكلام عشان اللي بيحصل في لبنان ... وبما إن وقف النار كمان خمس ساعات يبقى مبدهاش، حبتدي أكتب كل اللي كان واقف في زوري

جريدة الدستور

- الجرنال ده أنا اتعرفت عليه وأنا في تانية ثانوي على ما أتذكر - وفضلت متابعه لحد ما اتوقف ... مكنتش ناضج سياسيا قوي ساعتها - بس عرفت مجموعة من الأشياء اللي تحسب للجريدة اللي كنت شايفها في الفترة دي جريده نصف صفراء بصراحة و هوالة و أحيانا مرددة إشاعات

- نسيت الدستور دي خالص و عدت السنين لحد ما كنت مسافر مرة مع رئيس مجلس الإدارة في عربيته و عند بوابه إسكندرية لقيته بيقول للسواق يجبله الدستور من الولد بتاع الجرايد ... بعد كده تكرر الموقف ده كذا مرة و لاحظت إهتمام الراجل بالجريدة دي - ولإني عارف إنه راجل محترم و مثقف جدا حرصت في مرة إني أتصفحها و لفتت إنتباهي و بدأت في متابعتها بإنتظام بعد كده وانتقلت العدوى لمنزلنا العزيز :)

- لفت انتباهي فالدستور حكاية أنه كل واحد ليه صفحة ولا صفحتين بيدورهم على مزاجه و بطريقته - إنشاالله يكتبها كلها زي بلال فضل ... عجبتني الفكرة دي قوي ... إدت للجريدة روح ممتازة و حسيت إن الناس دي أسرة بجد وصحاب خصوصا لما بشوفهم بيعاكسوا بعض كل إسبوع في مقالاتهم

- عجبني فالدستور برضه انهم حاطين صورة كل واحد جنب إسمه - وإن أغلب المواضيع موقعة بأسماء ناس مش بدون أسماء زي في جرايد الحكومة وكمان سايبين إيميلاتهم الشخصية ... حسيت إنهم بيدعموا الصحفيين و بيساعدوهم على النجاح و الشهرة ... حفضت شكل بلال فضل و خالد كساب و عمرو سليم و دعاء دودة :)


إبراهيم عيسى

- الراجل ده أنا بحترم كتاباته و أغلب آراءه بغض النظر عما يقال عنه حاليا ... اللي أنا شايفه هو كاتب مثقف مهموم بهموم الوطن وبيساعد على كشف الحقيقة في مواضيع كثيرة وبشجاعة تحسب له

- طب إزاي سايبين الراجل ده يقول الكلام اللي بيقوله كل عدد وهجومه المباشر على الرئيس؟
فيه ثلات آراء سمعتهم في هذا الشأن: أول رأي هوه أنه بيجعجع ... هما سايبينه هوة واللي زيه عشان الشعب يلاقي متنفس يتكلم وأهو الكلام ببلاش ومحدش حيعمل حاجة في الآخر !
تاني رأي يتبع نظرية المؤامرة الشهيرة اللي بتتهمه أنه عميل حكومي و أنه متسلط و بيقول كلام هما عاوزينه يقوله لتضليل الرأي العام - وبصراحة أنا شايفه رأي فشنك لإن الراجل هاري الريس نقد وتريقة ... مش ممكن يكون الكلام ده برضاهم !
حتى لما صدر ضده الحكم أصحاب الرأي التاني قالوا دول بيسبكوها - بس معلهش مع إحترامي ... وسعت قوي
تالت راي أنه راجل شجاع وزاهد و إنه ملوش مسكة وفي واحد مهم و واصل قالي إنه بيجيله تهديدات و شتايم على التليفون من أمن الدولة بصورة دورية بعد كل مقال بيكتبه و أنه بقى متعود على ده !
.... طيب فين الحقيقة - الله أعلم ... ممكن تكون حاجة من التلاتة دول أو ميكس منهم أو حاجة رابعة محدش يعرفها ...
كل اللي يهمني أقوله إنه المنتج اللي بيقدمه كل يوم أربع منتج جيد جدا و يحترم
يبقى السؤال ملوش أهمية قوي كده يعني !

- طب إيه اللي بيتقال عنه اليومين دول ده و مشاكله في الدستور مع الصحفيين الشباب و موضوع المرتبات و خالد البلشي و عمرو سليم؟
والله العلم عند الله في الموضوع ده - أنا معرفش صحفيين في الدستور معرفة مباشرة ... لكن أنا ليا وجهة نظر ممكن متعجبش حد بس انا مقتنع بيها لحد كبير ...
في كل اللي بيتقال ده إحنا قدام مشكلة إدارية بحتة - مدير شركة بيحط سياسته العامة بفكر رأسمالي بحت سعيا أكيد لإن شركته دي تنجح و تحقق أرباح ... أظن ده حقه اللي لا يجب أن يتدخل فيه أحد ... ممكن أي حد ينتقد السياسة دي لكن الي مش عاجبه سياسة مديره من الممكن إنه يعتذر عن الشغل ويدور على شغل في مكان تاني في ظروف أحسن (أنا عملتها مرة قبل كده لما مكانتش عجباني سياسة مديريني في مكتبة إسكندرية)
يصح إذا إننا نفصل إبراهيم عيسى المدير عن إبراهيم عيسى الصحفي ... الفرق كبير جدا

- طب وحكاية مرتبه اللي بيصل إلى 26 ألف جنيه شهريا من الجريدتين ؟
والله أنا شايف أنه أي شخص على قمة الهرم بتاع أي مؤسسة ربحية لازم يكون شريك بنسبة من الأرباح عشان يفكر بعقلية البيزنس مان ويبقى قلبه على الربح ... والرقم ده بصراحة مش فلكي لحد زي الراجل ده أكيد إتمرمط لما قال يا كيفا ... هوة كتير بالنسبه لمرتبات الناس العادية ... لكن في كادر المديرين لأي مؤسسة ربحية - أنا شايفه فيير أوي !


عصام إسماعيل فهمي

- أول مرة ألتفت للإسم ده لما غادة بتاعت قسم الإعلانات فالدستور قابلتني و عرضت عليا أنزل إعلان عندهم وقالتلي إنهم مجموعة من خمس جرايد مملوكين للشخص ده (الدستور - صوت الأمة - صوت الأمة الرياضي - عين - الحلوة)

- أنا حاولت أقلب في دماغي ... مين الراجل ده - كان شغال إيه قبل ما يفتح الجرايد دي ! وسألت ناس كتير من باب الفضول ولم أجد إجابة عند أي حد فيهم !!

- أنا عرفت إن الراجل ده بتاع بيزنس وبس لما في مرة من يجي شهر و نصف كده شوفت إعلان للسلاب في الصفحة الأولى .... مصطفى السلاب اللي أكلوه أيام الإنتخابات - حتى ساعتها كنت ناوي أكتب في الموضوع ده بس كسلت

- برضه عرفت إنه راجل معندوش أزمة مع القيم الصحفية لما عرفت المضمون "الهادف" اللي بتقدمه جرايده التانيه الحلوة و عين


خالد البلشي

- كنت بقرأ إسمه زي أي صحفي شاب في تاني أو تالت صفحة - ومكانش ليه إسلوب مميز (في رأيي) زي بلال فضل و السرجاني و عائلة كساب و ابراهيم عيسى و دعاء - لكن منكرش انه التحقيقات في الدستور كانت دايما أكتر من ممتازة

- أول مرة أعرف دوره وإنه جندي مجهول في موضوع التحقيقات كان في العدد السنوي للدستور لما حد كتب عنه وعن دعمه لزمايله و إجتماعه بيهم أول كل إسبوع لتنسيق حيعملوا إيه و كلام حلو قوي ... عرفت ساعتها إنه ريسهم و ابتديت أهتم باللي بيكتبه بصفة خاصة


بلال فضل

- أول من لفت نظري في الدستور بخفة دمه و تلميحاته الجريئة ... منكرش إنه كان أحيانا بيبقى أول حد أقراله يوم التلات بليل والجرنال لسه طازة و بعدين أكمل باقي الجرنال يوم الخميس وانا راجع إسكندرية و السبت الصبح وانا رايح القاهرة تاني

- عرفت إنه كاتب سيناريو سينيمائي و إهتميت قوي إني اعرف هوه كان كاتب أنهي افلام ... إكتشفت إن كلها (ساعتها) كانت أفلام جميلة وعجبتني

- حصل تحول في شخصية بلال فضل من يجي تلات أو اربع شهور و فضل خانئني مده ... كنت شامم غرور شدييد في كتاباته و إرتفاع حدة الأنا عنده بس هوة خف دلوقتي لحد كبير ... والباقي اللي لسة عنده مقبول لإنه كاتب موهوب و أظن من حقه شوية غرور

- زعلت منه جدا لما دخلت فيلم حاحا وتفاحة مخصوص عشان عليه إسمه ... ولقيته مقلب - معرفتش ألاقي بلال فضل أو أي فضل في الفيلم ... الليمبي فيلم عبقري بالنسبة للفيلم ده للأسف و كنت ناوي أبعتله إيميل ساعتها بس كان في مرحلة الغرور ومحبتش ابعتله ميل و ميعبرنيش أو ملاقيش رد يشفي غضبي من تدني مستوى الفيلم

- عاد للتألق مؤخرا بعد ما غير شكل الصفحة و ركز في المقالات اللي هوة بيبدع فيها بصراحة



عمرو سليم

- أول ما لفت نظري هو التشابه الشديد في طريقة الرسم بين ما يرسمه عمرو سليم و الرسومات اللي كانت في مجلة ماجد زمان ايام ما كنت في ابتدائي و إعدادي و إفتكرته نفس الشخص ... بس طلع أبوه الله يرحمه

- لفت نظري كتاباته البريئة جدا وشخصيته الحالمة و تعصبه الناصري - حتى فكرة إنه يكتب بخطه و يشطب الكلام الغلط كانت جديدة وبتكسر أي حاجز تكلف بينه و بين اللي بيقراله ده طبعا جنب خفة دمه في الرسومات الصغيرة جنب الكلام و بين السطور

- تألق لما رسم صورة مبارك الشهيرة اللي أعتبرت بعد كده رمز للكارياتير في الدستور ... عجبتني قوي في بساطتها و قوة معناها و كنت عاوز أديله جايزة نوبل في الفنون على الإختراع ده ...

- لاحظت تغيبه المفاجيء عن الدستور - ومقال بلال فضل الغريب نسبيا ... وبعدين شفته صدفة فالتليفزيون في برنامج اطفال (اي والله) و حسيته إنسان نقي أوي و جميل - إحترمته قوي


خالد كساب

- لفت نظري كشاب مطرقع ومكتئب في نفس الوقت ... بيحب منير و بيكتب أنجلو اراب و بيهيس كتير قوي ... بحب الصفحة بتاعته و بعتبرها صفحه لايت في الجرنال حتى إن غادة بتاعة الإعلانات إعترفتلي إنها مش بتقرى غير الصفحة دي في الجرنال أصلا ... دي أول حاجة بتقراها و أحيانا كتير الحاجة الوحيدة :)

- لاحظت وجود أخوه بيكتب في نفس الصفحة - إسلوبه لذيذ ... لم أعتبرها محسوبيه عشان كده أكيد - ثم جاءت بيسان كساب اللي معرفش دي أختهم ولا قريبتهم ولا ده تشابه أسماء ... كتابتها كانت متواضعة في البداية وبعدين نضجت للأمانة و إن كانت لسة لها كتير

- لم أهتم بحفظ اسامي الناس اللي بيكتبوا عنده - عارفهم بالشبه كده ... شكلهم كلهم مطرقعين ... الصفحة لذيذة و شبابية جدا فا أنا مش معترض عليها


غادة من الدستور :)

- شخصية غير محورية لابد من ذكرها لإنها ساهمت بدون قصد في إلمامي بعدة معلومات عن الدستور كمؤسسة مهنيه و قد إصطلحت على تسمية نفسها ب "أنا غادة من الدستور" كل ما تكلمني في التليفون :)

- عرفت إنه إدارة الدستور مش بتوفر لمندوبي الإعلانات عندهم سيارة تنقلهم في زحام القاهرة مع إن أصل شغلهم التنقل بين العملاء بحثا عن إعلانات لما سالتني ببراءة أول مرة تيجيلي المكتب "اركب أيه" بعد ما كنت بوصفلها إزاي توصل بالعربية

- عرفت إنهم معندهمش غير كمبيوتر واحد لما شفت كم التخبط في المرة اللي إحتجت أبعتلهم إعلان ينشروهولي بالميل وإستسهالهم أنه حد يجي ياخد السي دي عن أنهم ينزلوا ملف من المييل (همة في العجوزة و أنا في مدينة نصر!!!)

- عرفت إنهم عدد صغيير قوي لما كنت بسأل على حد إتصل بيا و قالتلي هوة يا فلان يا فلان ... مفيش غيرنا !

- عرفت إنهم مكتفيين ماديا لحد كبير بأرباحهم من التوزيع فا مش فارقة معاهم إن أسعار إعلانتهم غالية (نفس اسعار الأهرام / ضعف أسعار الإسبوع مثلا) - و عرفت أرقام التوزيع بتاعتهم بالمرة


...........................

التدوينة الطويلة الممله دي هي ردي على المعركة الدائرة بين صحفيي الدستور عالنت و اللي هزت صورتهم قدام ناس كتير ومحتواها هو رايي الشخصي اللي من حق اي حد تناقشني فيه طالما في حدود اللياقة و آداب الحوار

لمتابعة المعركة

http://masrena.blogspot.com/2006/07/blog-post_07.html
http://aldostour.blogspot.com
http://manalaa.net/al_destour_flame_war
http://manalaa.net/al_destour_asks_about_security_infiltrating_blogs
http://img142.imageshack.us/img142/3705/qarar3eesa1jx2.jpg
http://img142.imageshack.us/img142/6898/qarar3eesa2cg4.jpg
(المستندات من جريدة الوعي المصرى الإلكترونية http://misrdigital.blogspirit.com )