Tagged again :)

ما أحلى أن تجد نفسك "تاجد" ... في وسط الأحداث المتلاحقة و فقدان الشهية التدوينية - أجد نفسي "تاجد" من المتألقة دائما (شوية قرع) إيبيتاف :) وإيمانا مني بإن التاج علينا حق زي ما في حد مش فاكره قال كده زمان - أجد نفسي مضطرا للمضي قدما فيما دفعت إليه (متزوقش بس)

إيبي ... شكرا :)

------------------------

ـــ هل أنت راض عن مدونتك شكلاً وموضوعاً؟
لحد ما ... شكلا هيه تقليدية و محافظة لحد كبير ... زيي تمام
أما موضوعا فا ساعات بحسها هيافة مني - بس أنا مش متضرر منها

ـــ هل تعلم أسرتك الصغيرة بأمر مدونتك؟
إخواتي آه - ماما سمعت عنها و حبت تقرأ اللي فيها بس أنا توهت يعني ... بابا مأظنش سمع بيها و أنا عارف إنه حيعترض أوي لو قرأ اللي بكتبه ده :)

ـــ هل تجد حرجاً فى أن تُخبر صديقاً عن مدونتك؟ هل تعتبرها أمرا خاصا بك؟
ممم - لازم يكون حد قريب قوي ... لأنه فيه ناس مش بعتبر انه مسموح لهم بالتعرف على شخصيتي بهذا القدر من القرب / لكن وللحق انا قولت عليه ليجي عشرة من صحابي

ـــ هل تسببت المدونات بتغيير إيجابى لأفكارك؟ اعطنى مثال فى حالة الاجابة نعم
أكييد ... شيلت هم البلد بجد - مش كلام فاضي كل ما تحصل مصيبة أسخن وخلاص ... المثال: مش عارف امسك حاجة دلوقتي !

ـــ هل تكتفى بفتح صفحات من يعقبون بردود فى مدونتك أم تسعى لاكتشاف المزيد؟
ميين ده - أكتفي شكلك متعرفنيش ... ده أنا عندي يجي 100 بلوج لينك محتفظ بيهم و بتابعهم بإنتظام

ـــ ماذا يعنى لك عداد الزوار.. هل تهتم بوضعه فى مدونتك؟
أنا حاطط واحد فعلا - هوه شويه بيعرفك إذا كان فيه حد مهتم يقرأ اللي بتكتبه ولا لأ ... بيبان قوي لما أقعد مدة مش بكتب جديد ولا بعلق في حتة تقريبا و ألاقي العداد بيزيد بإنتظام ... ده معناه انه ليه زوار منتظمين مش كل الناس بتجيلي طياري

ـــ هل حاولت تخيل شكل اصدقائك المدونين؟ اعترف
لأ تقريبا ... مش متذكر أي حالة ينطبق عليها ده ... يمكن عشان معجب بفكرة الكائن الإفتراضي اللي بيمثله أي مدون :)

ـــ هل ترى فائدة حقيقية للتدوين؟
يعني ... تأريخ لحياتك و أحداثك اليوميه - حالاتك النفسية - نمو افكارك - فضفضة لحد متعرفهوش مما ينتج عنه أفكار و أراء جديدة لحد ما ... يعني - ميكس كده

ـــ هل تشعر أن مجتمع المدونين مجتمع منفصل عن العالم المحيط بك أم متفاعل مع احداثه؟
متفاعل أكيد - مش الكل ... بس الغالبية متفاعلة يمكن اكثر من أغلب الأشخاص اللي لا يحملون لقب مدون

ـــ هل يزعجك وجود نقد بمدونتك ؟ أم تشعر انه ظاهرة صحية؟
بحاول طول عمري أتقبل النقد - أحيانا النقد بيضايق لما إسلوبه يكون فج ... لكن النقد المغلف بالإحترام و الموضوعيه بيبقى حلو بجد - كويس انك تشوف نفس الرؤى بمنظور الآخر (الكلام ده بجد مش أونطة)

ـــ هل تخاف من بعض المدونات السياسية وتتحاشاها؟ هل صدمك اعتقال بعض المدونين؟
لأ مش بخاف لإني عرفت التدوين من المدونات السياسية - تحديدا واحدة مصرية و بهية و منال وعلاء - وبعدين أنا كمان بكتب فالسياسة :)
إعتقال المدونين كأفراد من المجتمع بيشاركوا في العمل السياسي و المظاهرات لم يصدمني لإنه شيء متوقع عندنا فالبلد للأسف- لكن إستهدافهم لإنهم مدونين ده اللي صدمني فعلا

ـــ هل فكرت فى مصير مدونتك حال وفاتك؟
هههه - مفكرتش أصلا إني ممكن أفضل أدون لحد وفاتي :) (ده لو مت وأنا عجوز يعني)... بس عامتن أنا فكرت أنه ممكن ولادي في يوم من الأيام إنشاء الله يبقوا بيقلبوا فالمدونات التراثية يلاقوا مدونة أبوهم لما كان لسه وروور كده :)

ـــ آخر سؤال : تحب تسمع أغنية إيه- بلاش صيغة آمال فهمى دى - ما الاغنية التى تحب وضع اللينك الخاص بها فى مدونتك؟
والله أنا بحب سيد درويش قوي ... بس ملهوش لينكات كتير عالنت للأسف - بحبله قوي أغنيه إسمها إوعي يمينك (أغنية العربجية) ... الراجل قال إوعى يمينك / إوعى شمالك / إوعى فوقك / إوعى تحتك ... الملفت في الإغنية أنه مقالش إوعى وشك - مكنش على أيامهم البلطجة وصلت للمرحلة دي :)

ـــ اكتب اسماء خمسة مدونين ليقوموا بهذا الاستقصاء بعدك
ممم - أنا صحوبياتي في موضوع البلوجينج ده مش كتيرة يعني بس لما نشوف ...
1 - maat
2 - محمد حبيب
3 - shooting star
4 - maxxed out
5 - nephthys

... مشكله على فكرة - لازم الخمسة يكونوا بروفيشينال بلوجرز !

--------------

شكرا مرة تانية يا إيبي :)