مبروك عليكي عريسك الخفة ... يا عروسة - الجزء الثاني

أول ما انتقلت للعمل هنا في القاهرة من خمستاشر شهر تقريبا كنت بسافر بالسوبرجيت - لإنه أياميها كان رمضان و لأني بحب أفطر في إسكندرية يوم الخميس فا كنت بركب السوبرجيت حيث أن مستحيل ألحق التوربيني (ولا موأخذة) بتاع الساعة إتنين عشان مواعيد الشغل ...

المهم بعد ما خلص رمضان فضلت مقضيها سوبرجيت و غرب الدلتا لحد ما خنقوني قوي بسبب الأوتوبيسات البايظة و المواعيد الخربانة و المضيفات ال*** - ما علينا ...


أياميها بدأت أركب القطار و ظبت مواعيدي مع أسباني الساعة ستة اللي كان أياميها (هييييييه - كانت أيام) بيوصل في ميعاده حوالي تمانية و تلت ...

فضلت بركب القطر أفندي مستحمل التكييف اللي على طول بايظ في الصيف و العراك مع المفتش كل إسبوع عشان يصلحوا التكييف (أم التكييف في روايات أخرى موثقة)

هوب إبتده موضوع القطارات اللي بتخش فبعض و الجرارات اللي بتتحرق و العربيات اللي بتخبطها القطارات في المزلقانات وسبحان الله في يوم وليلة مبقاش في قطارات بتيجي في ميعادها ولا بتوصل في ميعادها مع إنهم لسة لحد دلوقتي بيتحرقوا و بيخبطوا في بعض (جرار أسباني الساعة ستة إتحرق من يجي شهر كدة وكنت من الناس اللي راكبين يوميها و اخدنا السكة في خمس ساعات بدل ساعتين !)


هنا ظهر حل عبقري جديد - ماهو المصريين ميغلبوش أبدا ... الميكرباصات التويوتا الأربعتاشر راكب بتاعة زمان اللي تدشدش ركب أي حد طويل زي حالاتي نزل منها فيرجن جديد خماستاشر راكب بس واسعة و مريحة و بالتكييف و كمان فيها دي في دي بلاير يعنى كمان حنشوف أفلام ... أنا مكدبتش خبر بعد ما ناس كتير نصحوني بيها و إبتديت آخد عليها على الرغم من مشاكلها المتمثلة في عدم وجود مواعيد ولا مواقف رسمية و طبعا السي دي الشهير اللي لازم السواق يشغلة إستفتاحة بعد سورة يوسف عدل بتاع دينا و البنات بتوع الإل بي سي وشوية رقاصات درجة عاشرة على صوت الفنان المتألق دائما زينة شباب شبرا - سعد أفندي الصغير !!

وعلى الرغم من إن سواق الميكروباص مرة عدى إشترى حشيش فالسكة وهو رايح القاهرة من حتة بعد العامرية بشوية (الله يكرمه خدنا معاه ووقفنا ننتظر الأخ الفاضل اللي كان بيجيبله الحشيش) بس أنا كنت مقرر الصمود للنهاية
...

لحد هنا خلص الكلام ...

إيه بقى اللي حصل بعد ما المحافظ الجديد تولى سدة الحكم في إسكندرية ...

الراجل ده قرر إنه يدعم السكة الحديد اللي فقدت أغلب روادها بسبب الحالة اللي وصلتلها بإنه يقضي على أي مواصلات بديلة تنقل الكام ألف بني آدم اللي بينتقلوا يوميا مابين القاهرة و إسكندرية ...

في يوم سبت نازل الصبح و واخد شنطتي على كتفي ورايح محطة مصر آخد ميكروباص من دول ملاقتش ولا واحد - ولقيت ناس كتييييييييير قوي واقفين - فيهم اللي واقف من أكتر من ساعة مستني الفرج ... أتاريهم موقفين ظابط مرور مخصوص عشان "يعكش" الميكروباصات دي !


أنا طبعا شوفت الحالة كدة قمت ناطط في تاكسي و سيدي جابر يا أسطى ... سبحان اللي خلاني أعمل تليفون لواحد صاحبي أساله ركب ولا لسة - قالي إنه ركب من الموقف و قالي متروحشي سيدي جابر - موقفين هناك ظابط برضه عشان "يعكش" الميكروباصات و مافيش ولا ميكروباص هناك

أنا قولت لصاحبي خلاص - أركب سوبرجيت وأمري لله

قالي لاااااء لهو انت ما تعرفش ... مش المحافظ نقل السوبرجيت و غرب الدلتا من سيدي جابر للموقف الجديد !!

أفندم !!!!!

يعني عشان أروح القاهرة يا أركب القطار و يعالم حيوصل إمتى - ده إن ماعملهاش و إتقلب ولا إتحرق أو أروح زي الشاطر الموقف الجديد عشان أركب سوبرجيت ولا غرب الدلتا ولا ميكروباص ولا بيجو حتى !!


طيب نراجع بقى المحافظ عمل إيه بالحركات الجريئة بتاعته دي :

1 - نقل محطة الأوتوبيسات الرئيسية بره المدينة ودي حاجة مسمعتش بيها في أي حتة في العالم - طول عمر محطة الأوتوبيسات بتبقى في نص المدينة !! - يا عم كانوا شالو السوبرجيت من ميدان الجيزة ولا من التحرير !! (جدير بالذكر إنه المحافظ السابق لما حب يعيد توزيع مواقف المواصلات العامة في إسكندرية نقل السوبرجيت من محطة الرمل لسيدي جابر مش للموقف الجديد مع إنه كان هوه اللي باني الموقف الجديد - يا سبحان الله )

2 - تسبب في خساير مهولة لشركات الأوتوبيسات - ميين ياخد تاكسي بعشرة جنيه من سيدي جابر للموقف الجديد عشان يرجع ياخد أوتوبيس بخمسة وعشرين جنيه ! - القطار أوفر و قعدته أريح حتى في وجود الريسك فاكتور و التأخير المضمون إنشاء الله ... وبعدين صحيح - على مين تكلفة المحطات الجديدة اللي بنوها الناس ده ومبقالهاش عشر سنين والمحافظ بيهدها لهم دلوقتي!

3 - قطع رزق الولاد سواقين الميكروباصات اللي بقوا خارجين عن القانون في يوم وليلة ومالهمش حتة يحملوا منها ركاب (مشفتهمش في الموقف الجديد لما رحت هناك)

4 - عمل رواج لسواقين التاكسي الجشعين اللي لن يتورعوا عن طلب أرقام فلكية من الركاب اللي شاءت الأقدار إنها ترميهم في الصحراء (الموقف الجديد) تحت رحمتهم ... آخر مرة بقول لسواق التاكسي محرم بك - بصلي من فوق لتحت و قالي حناخد عشرين جيني إنشاءالله - ويعلم الله إني كنت مستعجل عشان كده إكتفيت بإني أقوله "رووح الله يرضى عليك" - علما برضه بإني كنت حويط وشاورت لتاكسي بينزل ركاب لسة على باب الموقف عشان ميقوليش إنه بايت هنا من إمبارح مستني زباين !

5 - فضى حتة مكانش فيها أي مشاكل مرورية خطيرة يعني والله أعلم حيعمل فيها إيه - إسكندرية مش ناقصة نوافير والنبي ياأبا الحاج !!

---------------------------------------------


أنا بقى حعمل ديمو لواحد مسافر من القاهرة لإسكندرية يوم خميس (الكلام ده حصل معايا فعلا الخميس اللي فات)

1 - حجز في توربيني الساعة 2 ظهرا من قبلها بثلاث أيام عشان أضمن مكان = 25 جنيه (وجنيه معونة شتاء و عشرة صاغ مكافحة درن بيلموها من سنة 56 ولسة مصر فيها درن !)
2 - تاكسي من مدينة نصر لرمسيس 1:15 ظهرا عشان يادوبك ألحق = 10 جنيه
3 - وصول رمسيس 2:05 ظهرا - التوربيني إتحرك = تاكسي للتحرير = 5 جنيه
4 - غرب الدلتا لإسكندرية (الأوتوبيس بتاع 2:30 اللي مش بيعدي عالجيزة) = 22 جنيه
5 - إكرامية للعامل اللي حط الشنطة في بطن الأوتوبيس (بلطجة) = 1 جنيه
6 - الأوتوبيس يعطل في السكة وننتظر أوتوبيس يجي ينقذنا يا عالم إمتى = آذان المغرب يأذن و أنا صايم = بيبسي و باكو بسكوت لامبادا أبو نص جنية من عند مضيفة الأوتوبيس = الحساب 10 جنيه (راجع بوست السوبرجيت )
7 - وصول الموقف الجديد متأخر وإكرامية للعامل اللي جاب الشنطة من بطن الأوتوبيس (بلطجة) = 1 جنيه
8 - تاكسي لمحرم بك (الموقف الجديد بيقولوا عليه إنه في محرم بك برضه) = 5 جنيه (بالفصال)

إجمالي: 80 جنيه مصري فقط لا غير + خمس ساعات في الطريق !

يبقى لازم نرجع ونقول ...



مبروك عليكي عريسك الخفة ... يا إسكندرية !!!!!

مبروك عليكي عريسك الخفة ... يا عروسة - الجزء الأول

من يجي إسبوعين كده كنت معدي جنب سور كلية الهندسة في إسكندرية لقيتهم هادين الرصيف و عملينه كوام إكوام ... سواق التاكسي واضح أنه فوجيء هوه كمان بالمنظر ده قام شاتم المحافظ الجديد على العك اللي بيعكه واليوم الإسود اللي مسك فيه المحافظة ...

أنا كنت يومها في حالة سكون ومصالحة مع نفسي فا عملت فيها الشاب العاقل وقولتله أكيد عاوزين يوسعوا الشارع - الواسع أصلا - أو يمدوا أي مرافق جديدة - ماشاء الله عندك ميه و كهرباء و تليفونات و غاز وصرف صحي و صرف مطر ... محدش عارف - أكيد مش حيكسروه بدون سبب

السواق رد عليا بنبرة متحفزة قائلا إنه مايظنش - وحتى لو ... حبك يعني يخربوا الرصيف في الشتا - الشارع ده كله مدارس و كليات ... طب ما يعملوه فالصيف ولا حتى في نص السنة ... إسمع كلامي - الراجل ده من أول ما جه وهو عمال يعك !!

وخلص الكلام لحد هنا ...



الإسبوع اللي فات شاءت الأقدار إني أعدي في نفس الشارع - إبتدوا "يصبوا" البردورة بتاعة الرصيف و الأكوام زم ما هية - محفروش حاجة في الأرض و لا وسعوش الشارع !

حد يفهمني بقه - دغدغوا الرصيف اللي كان زي الفل ده ليه !!!

مصيبة ليكون عشان يصبوا البردورة !

أهي حكاية صب بردورة الرصيف دى قمة الجهل و الغباء و الفساد في وقت واحد ...



الرصيف القديم كانت البردورة بتاعتة بازلت (الحجر الأسود الصلب المنقر بتاع زمان ده) ... ميزة البازلت إنه شديد الصلابة و صعب الكسر فا لما بيعملوا أي عمليات صيانة بيشيلوه و بعدين يرجعوه هوة هواه تاني ... البازلت ده كان بيجي من أسوان - بس مع نمو المدينة بقى صعب يغطوا كل الأرصفة دي من البازلت عشان مدى توافره و بعد المسافة بين أسوان و إسكندرية مثلا فا مابقاش حل إقتصادي و إستبدلوه بالبلوكات الخرسانة - المخرومة من النص دي - البلوكات دي بيصبوها في قوالب ... ده حل إقتصادي مش بنفس عمر البازلت بس أرخص و منتظمة أكتر و بتاع ...
لما بيحبوا يفتحوا حتة في الرصيف البلوكات دي كان بيبوظ واحد ولا إتنين و لا حتى عشرة مكان ما فتحوا و بعد ما يخلصوا كانوا بيجيبوا بلوكات بدل اللي باظت دي و يغيروها و الغالبية بيبقي ممكن إستخدامها تاني

نيجي بقة للرصيف اللي بيتصب خرسانة كلة ده ...
أولا - أغلى ... شدات خشب و غلبة - من الآخر ... فتحة و نصبه !
ثانيا - بتشرخ ... وده منطقي جدا لإنهم بيصبوا أي بظرميط ودي خرسانة عادية مش مسلحة !
ثالثا - قابلة للتلف بسرعة - لو عربية ناشفة دخلت في الرصيف تكسرها ... لو البردورة دى وحدات حتتخلع مش تتكسر
رابعا - مش منتظمة وشكلها وحش - ماهي مش مصبوبة في قوالب في مصنع ... دي معمولة بلدي على أبوها كده في الشارع
خامسا - غير عملية على الإطلاق عشان لما يحبوا يفحتوا فتحة صغيرة حتي لازم يكسروها مش يشيلوها زي التانية - وأكيد تكسيرها صعب جدا و بعد ما يكسروها ويدفعوا مصاريف أكثر عشان إزالتها و مصاريف تانية عشان تترمي في المقالب العمومية يجوا يدفعوا مصاريف تالتة نظير إنها تتصب تاني من أول وجديد !!

يبقى ده إسمه إيييييه ...
يا جهل - لإنهم بيقلدوا والسلام ...
يا غباء - لإنهم محدش فيهم فكر قبل ما ياخدوا القرار ده ...
يا فساد - عشان يعملوا مقاولة من لاشيء و يفتحوا خزانة المحافظة و يصرفوا بدلات و إنتقالات و حركات !

يا إمه كوكتيل من التلاتة و دي حاجة أنا لا أستبعدها !!



مبروك عليكي عريسك الخفة ... يا إسكندرية !!!!!

--------------------------------------------

البردورة: صف الحجارة اللي على طرف الرصيف - اللي بيلونوها أبيض و إسود عشان تحدد الشارع للسائقين فا ميخوشوش في الرصيف

بايظ حضرتشيك !

إمبارح داخل أنا والولاد سيتي ستاز (نجيب باكو شيكولاتة طبعا) - داخلين من البوابة إلي عند الأوفيس بيلدينج ...

واحد ست حاطة ميك أب كتير: ... الله - ليه يعني !
موظف أمن: ممنوع !!
شاب طويل شايل كاميرا تلفيزيونية: طب هدي أعصابك ...
موظف الأمن: المكتب في الآخر عاليمين (مشيرا بيده إلى ال "نو ويير")

تتحرك الواحدة ست اللي حاطة ميك أب كتير خطوتين في إتجاه ال"نو ويير" السابق ذكره ...

الواحدة ست اللى حاطة ميك أب كتير: إيه ده هو مفيش حد فيكم جاي معايا (موجهه كلامها للواد والبت بتوع الأمن اللي واقفين عالبوابة)
موظف الأمن: لأ - مينفعش ... حضرتك روحي هاتيلنا "تسريح" دخول
الواحدة ست اللى حاطة ميك أب كتير: طب خليك انت هنا وانا جايالك (موجهه كلامها للكاميرا مان)

تتحرك الواحدة ست اللي حاطة ميك أب كتير مجددا في إتجاه ال"نو ويير" السابق ذكره ...

الواحدة ست اللى حاطة ميك أب كتير: طب متكلمهم عالبتاع ده اللي معاكو (ناظرة إلى جهاز الاسلكي القابض عليه موظف الأمن بقوة ولا لواءات الداخلية اللي في فيلم الإرهاب والكباب)
موظفة الأمن: بايظ حضرتشيك !

----------------------------------------

الشيء بالشيء يذكر ...

حد شاف بوستر شيرين عبد الوهاب بتاع حفلة راس السنة ...
أيوة شيرين آه يا ليل بتاعة القلعة ...
.
.
.
مش كدة ...
أنا قولت كده برضة !!!!!!!

لا حول ولا قوة إلا بالله

A must read article !

http://www.michaelmoore.com/words/message/index.php?id=202

A great article at michael moore - A must read I believe

----------------------------------------------------------------------------------

the link was posted in Muslim in the Lands of Allah's comment at Neferteeti's blog