عودة أحد البلوجرز - فيلم من إخراجك يا مصر !!

يعني أنا بقالي أكتر من شهر غطسان - الأول عشان الشغل اللي اتكركب مرة واحدة مع بعض المشاكل على الجبهة الداخلية في حياتي - وبعدين حالة خنقة و مش حاسس إني عاوز أكتب حاجة - أي جست ديدنت فييل لايك بلوجينيج زن ...

وبعدين رمضان جانا - أهلا رمضان - حيث لا يوجد وقت لأي بني آدم بيشتغل بجد إنه يهرش حتى و حيث يوجد أكبر متسع من الوقت عند أي إنسان أونطجي ما بيصدق إنه رمضان جه عشان يتدلع و "يحلق" لأي حاجة في الدنيا و يهرب من جميع مسؤلياته على حس "معلهش بقى رمضان - كل سنه وانت طيب"

المهم - اللي إكتشفته إنه طول ما أنا بشوف الأفلام اللي بشوفها دي كل يوم - مستحيل أبطل كتابة... إيدي بتاكلني على طول !

الجمعة اللي فاتت صليت في الجامع اللي عند مزلاقان سيدي بشر - الجامع خلص بدري ... وبغض النظر عن اللي الخطيب قاله واللي ميكملش بنص جنيه خطبة - كان عندي مشاوير مهمة في وسط البلد فا نطيت في أول ميكروباص واقف يحمل نازل محطة مصر

المشروع (الميكرباص) حمل نص الركاب و جه السواق عشان يدور و يقوم ... راجل طول بعرض بكرش ولا محمد على باشا في زمانه و معاه كباية شاي لسة مليانة و سيجارة في نصها كده ... أنا قولت أكيد مسيحي - ماهو أغلب سواقين المشاريع على الخط ده مسيحيين - ... مفيش مشكلة بس يشرب سيجارته فالشباك بس عشان مش ناقصة خنقة

السواق قام بالعربية و قعد يدور فالشرايط اللي قدامه ... دعيت ربنا مايشغلش جورج وسوف (المطرب الرسمى والمعتمد عند كل السواقين على الخط ده) ... الراجل حط الشريط وإذا بصوت رخيم مألوف لأغلب العرب المسلمين ينبعث من الكاسيت بتاع العربية - سورة يوسف للقارئ الشيخ مشاري بن راشد العفاسي !!!

سواق مسلم بيسمع قرآن وماسك كباية شاى وبيجاهر بإفطاره في رمضان ...

عجبت لحالك يا مصر !!