عارف جاليري "تاون هاوس" اللي في وسط البلد ... وحش متجيبش منه !!!

أول امبارح نزلت وسط البلد استمشى حبتين - كنت حاطط فالمحفظة من مدة عنوان جاليري للفن الحديث كان فيه مدونة مشكرة فيه لدرجة اني قولت ده أكيد جنة الفنانين في الأرض ...
ولأني ساذج وطيب وعلى نياتي ... ولأني بعتبر نفسي من ذواقي الفن لحد ما - قررت اني أروح استمتع بأمسية ثقافية و اعمال لفنانين مصريين معاصرين ...

طبعا الوصفة سهلة ... من ميدان طلعت حرب لمحمود البسيوني لشامبليون لشارع ضيق اسمه نبراوي لحارة أضيق فيها جراج

أيوة أيوة
هناك !

المشهد الأول:

حارة ضيقة ... نظيفة لحد كبيير ... نجار "أويمجي" عاليمين تحت بلكونة ... اتنين زنوج متأمركين على باب عالشمال - عربيات شيك في جراج عاليمين لا تتناسب مع جو المكان ! ومبني عالشمال معترض مسار الحارة ... هوه ده الهدف !

كان فيه ثلاث أبواب - واحد في الوش مكتوب عليه "شوب" يعني محل :) - والتاني أول شمال مكتوب عليه "جاليري" - والثالث جنب التاني ... جراج أو مخزن قديم وفيه ناس زي اللي في حصة الأعمال الفنية في تالتة ابتدائي :)

دخلت الجاليري ... واضح انه مخزن قديم - مطلي طلاء جديد - متواضع لكن نظيف ... الأرض معمولة تستيكة اسمنت ... شوية "أعمال" متعلقة عالحيطان ... إضاءة قوية جدا - الجو حر - سوء تهوية مرعب ...
فرن بلدي يعني !

أغلب الأعمال عبارة عن إزاي تعمل عروسة من ورق الجرايد - علب السجاير - سلك المواعين - خيش - زبالة !

المشكلة اننا لو جبنا طفل في تانية ابتدائي مش حيعجبة أي عروسة من دول - ولافيش أي نوع من الفن أو الدلالات فالي متعلق ده - واضح إن الناس دي فاكرين الفن هبل فالجبل ويلا محدش فاهم حاجة !

وبعدين الحاجات دي معروضة للبيع ... يا سلام؟؟؟
أها ... بس كدة ... دي نصباية يا معلم :) ... العروسة الواحدة تتراوح ما بين 150 و 400 جنية !! - ومفيهاش خامات بأربعة جنية!! و لا فن بربع جنيه - ومتاخدش خمس دقايق شغل !


كان قاعد عالباب واد شكلو كده "دبلون" العيال عاملينو سيكيوريتي ... لما اتأخرت أنا و صحبي جوة دخل ورانا لنكون بنخرب الفن اللي مبهدل الحيطان ده :)

خرجنا تاني للهواء !!

المشهد التاني:

صينية مدورة بلاستيك لونها أحمر عليها طبق فول بالزيت و كام رغيف عيش و طبق مخلل - محطوطين على عتبة الباب اللي مكتوب عليه "شوب"

دخلنا ... مكان صغير نسبيا ... الأرض بلاط أسمنتي ... الطلاء أظنه كان أصفر ... نفس الإضاءة المستخدمة سابقا بس التهوية أحسن كتيير - زإن كانت ماتزال سيئة !

كراكيب متعلقة عالحيطان و مجلات لامضمونية ... المحل بيخاطب السياح على ما يبدو من الحاجات المعروضة ...
أبرز المعروضات مجموعة "فانلات" اسمها " بلدى "
والله والحق يقال ... بيئة بيئة يعني ... تخيل نفسك لابس "فانلة" صفرا صفرا ... وعليها إعلان شاي العروسة ... ولا "فانلة" خضرا عليها إعلان "بيمبو" ... الواد المعاق بتاع السبعينات ده وهوه بياكل البسكويت الأشهر في مصر فالعقدين الماضيين !

بس وللأمانة كان فيه شوية صور فتوغرافية عالشمال فالنص ... اللي مصورها - لو مش سارقها - فنان ... أغلب الأعمال الفتوغرافية حلوة على فكرة و ان كان فيه كتير مكرر - كذا زاوية لنفس الشيء بدون مالزوايا الجديدة تضيف أي حاجة !




باب ضيق يؤدي للفراغ الثالث ...

المشهد الثالث:

مخزن أو جراج قديم ... محاولات لمجموعة من الهواة للإنتساب للفن ... ترابيزات متهالكة في المنتصف ... ناس قاعدة تشخبط هنا و هناك ... بنت محجبة شكلها محترم قاعدة تعمل عروسة خيش بمسدس بلاستيك وانهماك شديد !

واحد قاعد يرسم يجي 4 لوح في وقت واحد منهم واحدة "باننر" - لوح ابلاكاش رفيع و طويل وقاعد يرسم وشوش بألوان من علب طلاء ! بس واضح انه مكتر "التنر" علشان الورق بايش ومضعضع قوي ...

أول مرة أشوف فنان عامل خط انتاج لوح :)

قبل باب الخروج واحد سايب لوحة تنشف ... بورتريه لسيدة عجوز نقلا عن صورة فتوغرافية لاتشبهها بالمرة !

... أفتكر واحنا في سنة أولى رسمنا بورتريه برضه من صور شخصية ... كان أغلب الأشخاص المرسومين بيطلعوا قرايب الناس اللي فالصور فالآخر ! - الواد ده محتاج د.ابتهال علشان تديله -2 من 10 علشان اللي عمله ده إهدار لفلوس أهله اللي جابوله اللوحة والألوان :)

المشهد الرابع:

واضح ان البلكونة اللي فوق النجار تبعهم ... بس مش طالع - مش طالبه اشتغالات !!