اسكندرية - يوم الجمعة

هو العيب فين ...
القاهرة يوم الجمعة ...
ولا يوم الجمعة فأي حتة غير اسكندرية ...

I hate this !!!

لازم أصحى متأخر بعد ما ماما تغلب معايا :)
يادوبك ألحق آخد الدش المتين و أفطر فطار بجد ومعايا أهرام الجمعة المستفز ...
أجري عالجامع أسمع الشيخ بتاع وزارة الأوقاف التعبان اللي على قد حالة و هوب ! أقم الصلاة
أسلم بعد الصلاة عالعيال - أو اللي لسة فاضل منهم بيصلي في نفس الجامع ...
ألحق أكلم "مهموها" مكالمة يوم الجمعة بعد الصلاة ... أشهر و أهم مكالمة اسبوعية لينا ...
أقفل معاها لما أوصل لشباك التذاكر في محطة مصر - لازم أحجز في قطار الساعة سبعة بتاع بكرة...
أطلع عالقهوة - الدرينى أو الشرق ... أقعد مع الواد علي و الواد رامي و آخرون ... أسمع أخبار اسكندرية و احكيلهم عن أخبار القاهرة...
أخلص ال"فانتا" و أجري عالبيت أتغدغ غدواية سخنة من إيد ماما ... ويا سلام لو سمك أو فراخ ...
أقول لماما مش حنام و بعدين أطلع عيل و أنام زي كل مرة :)
أصحى - أنزل أتسنكح ... مرة عادل و مرة لطفي و مرة فتح الباب و مرة وائل و مرة كل الناس دي :)
أرجع متاخر و أسهر أودع التلفزيون اللي مش بلاقي وقت أشوفه فالقاهرة و أنام عالفجر ...
.
.
.
.

النهاردة محصلش ولا حاجة من دول :(
"أي ميس يو مي دير أليكس - أي ميس يو أوول"
المرة دي الإسبوع بقى أربعتاشر يوم:(

عاوز أروااااح